ભારતીય બેંકોના હજારો કરોડ રૂપિયા લઈને ઈંગ્લેન્ડ ફરાર થઈ ગયેલા હીરા વેપારી નીરવ મોદીને આગામી 28 દિવસમાં ભારત પરત લાવવામાં આવી શકે છે. નીરવ મોદી ઈંગ્લેન્ડમાં તેની કાનૂની લડાઈ હારી ગયો છે. નીરવ મોદી માટે બચવાનો કોઈ રસ્તો બચ્યો નથી. જો વધુ રાહત નહીં મળે તો આગામી 28 દિવસમાં નીરવ મોદીને ભારત લાવવામાં આવશે. આ વાત સોમવારે રાજ્યસભામાં સરકાર તરફથી કહેવામાં આવી હતી.
ફેબ્રુઆરી 2017માં સેન્ટ્રલ બ્યુરો ઓફ ઇન્વેસ્ટિગેશન (CBI)એ નીરવ મોદીની તપાસ શરૂ કરી હતી. સીબીઆઈએ પંજાબ નેશનલ બેંક (PNB)ની ફરિયાદ પર તપાસ શરૂ કરી હતી, જેમાં આક્ષેપ કરવામાં આવ્યો હતો કે નીરવ મોદી અને તેના સહયોગીઓએ વિદેશી સપ્લાયરો માટે બનાવટી બિલો મેળવવાનું કાવતરું ઘડ્યું હતું અને તેમની સાથે રૂ. 270 કરોડની છેતરપિંડી કરી હતી. પંજાબ નેશનલ બેંકના નુકસાનની સંભવિત રકમ 11,000 કરોડ રૂપિયા સુધી હોઈ શકે છે. પંજાબ નેશનલ બેંકની વિનંતી પર એન્ફોર્સમેન્ટ ડિરેક્ટોરેટ (ED) પણ છેતરપિંડીના આ કેસ પર નજર રાખી રહ્યું છે.
સોમવારે રાજ્યસભામાં માહિતી આપતા બીજેપી સાંસદ સુશીલ મોદીએ કહ્યું કે, જેઓ નીરવ મોદી વિશે વાત કરતા હતા કે નીરવ મોદી ભાગી ગયો, તે ક્યારે પાછો આવશે. હું ગૃહને જણાવવા માંગુ છું કે યુકેમાં નીરવ મોદી માટે ઉપલબ્ધ તમામ કાયદાકીય વિકલ્પો ખતમ થઈ ગયા છે. જો યુરોપિયન કોર્ટ ઓફ હ્યુમન રાઈટ્સ તરફથી કોઈ રાહત ન મળે અથવા ઈંગ્લેન્ડ તેને આશ્રય ન આપે તો આગામી 28 દિવસમાં નીરવ મોદીને ભારત લાવવામાં આવી શકે છે.
બ્રિટનની હાઈકોર્ટે પંજાબ નેશનલ બેંક સાથે હજારો કરોડની છેતરપિંડી કરવાના આરોપી નીરવ મોદીને ભારતને પ્રત્યાર્પણ ન કરવાની અરજી ફગાવી દીધી છે. હાઈકોર્ટના નિર્ણય બાદ નીરવને ભારત લાવવાનો રસ્તો ઘણી હદ સુધી સાફ થઈ ગયો છે. જો કે હજુ આ અંતિમ નિર્ણય નથી. નીરવ મોદીને ભારત લાવવામાં થોડો સમય લાગી શકે છે. નિષ્ણાતો કહે છે કે યુકે પોલીસ કૂટનીતિ અને માનવાધિકાર નિયમોની યોગ્ય કાયદાકીય પ્રક્રિયા પૂરી થયા પછી નીરવને સીબીઆઈને સોંપી શકે છે. સીબીઆઈ આ પછી જ નીરવને બ્રિટનથી ભારત લાવશે.
આ પણ વાંચો:પ્રોટેમ સ્પીકર તરીકે ધારાસભ્ય યોગેશ પટેલે લીધા શપથ, નવા અધ્યક્ષ તરીકે જાણો કોણે ભર્યુ ફોર્મ
આ પણ વાંચો:સુરેન્દ્રનગર જીલ્લાના આ ગામોમાં નર્મદા નહેર એક સોભાના ગાઠીયા સામાન
આ પણ વાંચો:ઘેલા સોમનાથ મંદિરની અંદર જળાભિષેક કરવા માટેનો ચાર્જ વધતા ભક્તજનોમાં નારાજગી
