વર્લ્ડ કપ 2023માં પાકિસ્તાને શ્રીલંકાને 6 વિકેટે હરાવ્યું છે. પાકિસ્તાનને 345 રનનો ટાર્ગેટ મળ્યો હતો. રિઝવાને અણનમ સદી રમીને પાકિસ્તાને ઐતિહાસિક જીત અપાવી હતી, શ્રીલંકાએ 344 રનનો વિશાળ સ્કોર ખડક્યો હતો પરતું પાકિસ્તાનની ટીમે 4 વિકેટના નુકસાન પર મેચ જીતી હતી.પાકિસ્તાને મંગળવારે વર્લ્ડ કપ 2023માં શ્રીલંકા સામે 6 વિકેટે ઐતિહાસિક જીત નોંધાવી હતી. હૈદરાબાદના મેદાન પર શ્રીલંકાએ 345 રનનો ટાર્ગેટ આપ્યો હતો, જેને પાકિસ્તાને 48.2માં 4 વિકેટ ગુમાવીને હાંસલ કરી લીધો હતો. વર્લ્ડ કપના ઈતિહાસમાં લક્ષ્યનો પીછો કરતા આ સૌથી મોટી જીત છે. આ પહેલા આ રેકોર્ડ આયર્લેન્ડના નામે હતો. આયર્લેન્ડે ઈંગ્લેન્ડ સામે 329/7નો સ્કોર કરીને વર્લ્ડ કપ 2011 જીત્યો હતો. પાકિસ્તાન vs શ્રીલંકા મેચમાં વિકેટકીપર બેટ્સમેન મોહમ્મદ રિઝવાન અને ઓપનર અબ્દુલ્લા શફીકે શાનદાર સદીની ઇનિંગ્સ રમી હતી. રિઝવાને 121 બોલમાં 8 ચોગ્ગા અને 3 છગ્ગાની મદદથી 131 રનની અણનમ ઇનિંગ રમી હતી. તેણે વિનિંગ ફોર ફટકારી. શફીકે 103 બોલમાં 113 રન બનાવ્યા હતા. તેણે 10 ફોર અને 2 સિક્સર ફટકારી હતી.

શ્રીલંકાએ પાકિસ્તાનને 345 રનનો લક્ષ્યાંક આપ્યો છે. શ્રીલંકાએ નિર્ધારિત 50 ઓવરમાં 9 વિકેટ ગુમાવીને 344 રન બનાવ્યા હતા. શ્રીલંકા તરફથી કુસલ મેન્ડિસે સૌથી વધુ રન બનાવ્યા હતા. તેણે 77 બોલમાં 14 ચોગ્ગા અને 6 છગ્ગાની મદદથી 122 રનની તોફાની ઇનિંગ રમી હતી. સાદિરા સમરવિક્રમાએ 89 બોલમાં 108 રન ઉમેર્યા હતા. તેણે 11 ચોગ્ગા અને 2 છગ્ગા ફટકાર્યા હતા. સમરવિક્રમાની આ પ્રથમ વનડે સદી છે.