ઈઝરાયલ અને હમાસ વચ્ચે યુદ્ધ ચાલી રહ્યું છે. આ યુદ્ધમાં ઈઝરાયલના અનેક સૈનિકો માર્યા ગયા છે. તેમાંથી મોટાભાગના અપરિણીત છે. આવી સ્થિતિમાં તેમણે પોતાના શહીદ પુત્રની નિશાનીઓ જીવંત રાખવા માટે એક રસ્તો શોધી કાઢ્યો છે. આ માટે ઈઝરાયલ સરકારે ‘સ્પર્મ’ સાચવવાની પ્રક્રિયાને સરળ બનાવી છે. બલિદાન આપનાર સૈનિકને દફનાવતા પહેલા આ પ્રક્રિયા પૂર્ણ કરવામાં આવશે અને સ્પર્મને કોલ્ડ સ્ટોરેજમાં સુરક્ષિત રાખવામાં આવશે. બાદમાં ગર્ભધારણની પ્રક્રિયા દ્વારા ઉક્ત સ્પર્મમાંથી એક ગર્ભ વિકસાવવામાં આવશે. હાલમાં ઈઝરાયલમાં પોસ્થૂમસ સ્પર્મ રિટ્રાઈવલ પ્રક્રિયા હેઠળ એક વિધવા મહિલા તેના સ્વર્ગસ્થ પતિના સ્પર્મને બચાવી શકે છે. આ માટે તેમણે કોઈ કાયદાકીય પ્રક્રિયામાંથી પસાર થવાની જરૂર નથી.
વંશ આગળ વધતા અટકે નહીં તે માટે આ નિર્ણય લેવામાં આવ્યો
હવે માતા-પિતાને પણ પુત્રના સ્પર્મને સાચવવાનો અધિકાર આપવામાં આવ્યો છે. આ એટલા માટે કરવામાં આવ્યું છે કારણ કે શહીદ થયેલા ઘણા સૈનિકો અપરિણીત છે અને તેમના આ દુનિયામાંથી વિદાય લીધા પછી પરિવારનું સાતત્ય ખતમ થવાની સંભાવના છે. એક પડકાર એ પણ છે કે ઓછી વસ્તીવાળા ઈઝરાયલમાં યહૂદીઓની સંખ્યા વધુ ઘટે નહીં. તેથી ઘણી ઔપચારિકતાઓને દૂર કરીને આ પ્રક્રિયાને સરળ બનાવવામાં આવી છે. ઈઝરાયલના આરોગ્ય મંત્રાલયે અસ્થાયી રૂપે પ્રક્રિયાને સરળ બનાવી છે અને માતાપિતાને સશક્ત કર્યા છે.
ઉલ્લેખનીય છે કે, ઈઝરાયલ અને હમાસ વચ્ચે 7 ઓક્ટોબરથી યુદ્ધ ચાલી રહ્યું છે. 7 ઓક્ટોબરના રોજ હમાસના આતંકીઓએ ઈઝરાયેલ પર ત્રણ બાજુથી હુમલો કર્યો અને ભયંકર નરસંહાર કર્યો. જેમાં 1400 ઈઝરાયલના લોકો માર્યા ગયા હતા. ત્યારથી ઈઝરાયેલ ગાઝા પર સતત હુમલા કરી રહ્યું છે. આ હુમલામાં સૈનિકો સહિત સામાન્ય નાગરિકો પણ માર્યા ગયા છે. બીજી તરફ પેલેસ્ટાઈનએ કહ્યું છે કે, ગાઝામાં હમાસને નષ્ટ કરવા ઈઝરાયલની વળતી સૈન્ય કાર્યવાહીમાં 10,569 લોકો માર્યા ગયા છે. જીવ ગુમાવનારા નિર્દોષ નાગરિકોમાં મહિલાઓ અને બાળકો પણ સામેલ છે.
આ પણ વાંચો: સરકારની પ્રત્યક્ષ કર વેરાની આવક બજેટ લક્ષ્યના 58 ટકાને વટાવી ગઈ
આ પણ વાંચો:ઇઝરાયેલ-હમાસ યુદ્ધના 35મા દિવસે, 401મી બ્રિગેડે 150 આતંકવાદીઓને ખતમ કર્યા
આ પણ વાંચો: દિલ્હી બાદ અમદાવાદના કેટલાક વિસ્તારો વાયુ પ્રદૂષણની ઝપેટમાં, AQI સ્તરમાં થયો વધારો
