Rajkot Funblast Gamezone Fire: રાજકોટ શહેરના પોશ વિસ્તાર ગણાતા કાલાવડ રોડ પર આજે રવિવારની રજાના દિવસે એક ભયાનક દુર્ઘટના ઘટતા રહી ગઈ છે. કાલાવડ રોડ પર આવેલા જાણીતા ‘ફનબ્લાસ્ટ ગેમઝોન’માં અચાનક ભીષણ આગ ફાટી નીકળતા રમત-ગમત માટે આવેલા બાળકો અને વાલીઓમાં ભારે નાસભાગ મચી ગઈ હતી. સદનસીબે, આ ઘટનામાં કોઈ જાનહાનિ થઈ નથી, જે મોટી રાહતની વાત છે.
Rajkot : વેકેશનના કારણે ગેમઝોન ભરેલો હતો
આજે 26 એપ્રિલ અને રવિવાર હોવાથી તેમજ વેકેશનનો માહોલ હોવાને કારણે ફનબ્લાસ્ટ ગેમઝોનમાં સવારથી જ બાળકો અને પરિવારોની મોટી ભીડ જોવા મળી રહી હતી. બપોરના સમયે અચાનક આગ લાગતા ધુમાડાના ગોટેગોટા આકાશમાં દૂર-દૂર સુધી દેખાવા લાગ્યા હતા. આગની જ્વાળાઓ જોઈ ગેમઝોનની અંદર રહેલા લોકો જીવ બચાવવા બહાર તરફ દોડ્યા હતા, જેના કારણે થોડીવાર માટે નાસભાગ જેવી સ્થિતિ સર્જાઈ હતી.
શોર્ટ સર્કિટના કારણે આગ લાગ્યાનું અનુમાન
આગ કયા કારણોસર લાગી તે અંગે હજુ સુધી કોઈ સત્તાવાર પુષ્ટિ કરવામાં આવી નથી, પરંતુ પ્રાથમિક તપાસમાં શોર્ટ સર્કિટના કારણે આ ભીષણ આગ લાગી હોવાનું અનુમાન લગાવવામાં આવી રહ્યું છે.
ફાયર બ્રિગેડની કામગીરી અને જાગૃતિ
ઘટનાની જાણ થતા જ રાજકોટ ફાયર બ્રિગેડની ટીમ ઘટનાસ્થળે દોડી આવી હતી. ફાયર ફાઈટરોએ સતત પાણીનો મારો ચલાવી આગ પર કાબૂ મેળવવાનો પ્રયાસ કર્યો હતો. સતર્કતાને કારણે સમયસર લોકોને સુરક્ષિત બહાર કાઢી લેવામાં આવ્યા હતા, પરિણામે એક મોટી દુર્ઘટના ટળી હતી.
હાલમાં ફાયર વિભાગ દ્વારા ‘કૂલિંગ પ્રક્રિયા’ હાથ ધરવામાં આવી છે અને આગ લાગવાનું ચોક્કસ કારણ જાણવા માટે તપાસ શરૂ કરવામાં આવી છે.
આ પણ વાંચો: ડ્રાઈવરની બીડીથી ભડકી આગ, 4ના કરૂણ મોત
આ પણ વાંચો: જૂનાગઢના મેઘાણીનગરમાં ભીષણ આગ, 10 વાહનો બળીને રાખ
આ પણ વાંચો: માણેકચોકમાં ભીષણ આગથી અફરાતફરી
