Rajkot News: રાજકોટ મહાનગરપાલિકાએ શહેરના ઇતિહાસમાં પહેલીવાર એટલું વિશાળ મેગા ડિમોલિશન (Rajkot Mega Demolition) ઓપરેશન જંગલેશ્વર વિસ્તારમાં શરૂ કર્યું છે, જેના પર હવે સમગ્ર ગુજરાતની નજર છે. ગેરકાયદે બાંધકામ સામેની આ કાર્યવાહી માટે સમગ્ર વિસ્તારમાં 7 ઝોન બનાવવામાં આવ્યા છે અને દરેક ઝોન માટે જુદી જુદી ટીમોની રચના કરવામાં આવી છે.
7 ઝોન, 260થી વધુ મશીનો અને માઇક્રો પ્લાનિંગ, મહાનગરપાલિકાએ આ ઓપરેશન માટે વિશાળ મશીનરી તૈનાત કરી છે:
64થી વધુ JCB,90 ટ્રેક્ટર, 7 હિટાચી મશીનો,50 બ્રેકર,42 ગેસ કટર,14 ડમ્પર, કુલ મળીને 260થી વધુ મશીનો દરેક ઝોનમાં વર્ગ-1 અધિકારી, ટેક્નિકલ સ્ટાફ, સુપરવાઇઝર અને ફિલ્ડ વર્કરો નિયુક્ત કરવામાં આવ્યા છે. મેગા ઓપરેશનને ધ્યાનમાં રાખીને માઇક્રો પ્લાનિંગ પણ કરવામાં આવ્યું છે.
Rajkot Mega Demolitionમાં સુરક્ષા વ્યવસ્થા: 2500થી વધુ પોલીસ જવાનો તૈનાત
સમગ્ર વિસ્તારમાં કાનૂની અને સુરક્ષા વ્યવસ્થા કડક કરવામાં આવી છે. 2500થી વધુ પોલીસ અને અર્ધલશ્કરી દળો,25 ડ્રોન કેમેરા,30 વોકીટોકી સેટ,સઘન મોનિટરિંગ દ્વારા ડિમોલિશન કામગીરી સુવ્યવસ્થિત રીતે ચલાવવામાં આવી રહી છે.
ફક્ત 2 દિવસમાં 1026 મકાનો જાતે જ ખાલી
અધિકારીઓના જણાવ્યા મુજબ, અત્યાર સુધીમાં 1026થી વધુ મકાનો લોકો પોતે જ ખાલી કરી ચૂક્યા છે.ઘણા પરિવારો એવાં પણ હતા જે જાતે જ હાથોડા અને ડ્રિલ વડે પોતાના મકાનો તોડી રહ્યા હતા.આ સ્થળોએ પણ પોલીસ અને ફાયર બ્રિગેડ તૈયાર સ્થિતિમાં હાજર રહી હતી.
શેઠ હાઇસ્કૂલથી ઓપરેશનનો આરંભ, 5000થી વધુ સ્ટાફ એકત્ર
ડિમોલિશન (Rajkot Mega Demolition) માટેની તમામ ટીમો સવારે શેઠ હાઇસ્કૂલ ખાતે ભેગી થઈ અને સિટી બસો, ટ્રેક્ટર, ડમ્પર અને અન્ય મશીનરી સાથે જંગલેશ્વર તરફ રવાના થઈ. 2500 પોલીસ,2500 મનપા સ્ટાફ,કુલ 5000 કરતાં વધુ કર્મચારીઓ સાથે સાથે કર્મચારીઓ માટે પાણી, કેળા અને જરૂરી ખોરાકની વ્યવસ્થા પણ કરવામાં આવી છે.
મનપા કમિશનર દ્વારા કન્ટ્રોલરૂમથી મોનિટરિંગ
મેગા ડિમોલિશન માટે ખાસ કંટ્રોલરૂમ નીલકંઠ ટોકીઝ સામે સ્થાપિત કરવામાં આવ્યો છે, જ્યાંથી મનપા કમિશનર સમગ્ર પરિસ્થિતિનું લાઈવ મોનિટરિંગ કરી રહ્યા છે. ચારેય સિટી ઇજનેરોને જુદી જુદી ટીમોના ઇન્ચાર્જ તરીકે નિયુક્ત કરવામાં આવ્યા છે.
રાજકીય પ્રતિક્રિયા, “જંગલરાજ ચાલી રહ્યું છે”
ડિમોલિશન મામલે રાજ્યના પૂર્વ મુખ્યમંત્રી શંકરસિંહ વાઘેલાએ ગંભીર પ્રશ્નો ઉઠાવ્યા છે. તેમણે કહ્યું કે, “જંગલેશ્વરમાં આજે ગેરકાયદે બાંધકામ દૂર થઈ રહ્યા છે, પરંતુ જ્યારે આ બાંધકામ કરવામાં આવ્યા ત્યારે શા માટે રોકાયા નહીં? ગરીબોની પરસેવાની કમાણીના મકાનો તોડી નાખવામાં આવે છે, એ ન્યાયસંગત નથી.”
જંગલેશ્વર વિસ્તારનું હાલનું દૃશ્ય
જંગલેશ્વરમાં હાલ બુલડોઝરનો અવાજ, પોલીસનો બંદોબસ્ત અને મશીનોની હલચલથી સમગ્ર વિસ્તાર મિની-ઝોનલ યુદ્ધભૂમિ જેવી સ્થિતિમાં છે. દરેક ગલીમાં ટીમો ફરજ બજાવી રહી છે અને ડ્રોન ફૂટેજ દ્વારા મોનિટરિંગ ચાલુ છે.
રાજકોટના જંગલેશ્વરમાં ચાલતું આ મેગા ડિમોલિશન માત્ર એન્ટી-ઇન્ક્રોચમેન્ટ જ નહીં, પરંતુ શહેરના વિકાસ મૉડલ માટેનું શહેરવ્યાપી મેસેજ છે. આગામી દિવસોમાં આ કાર્યવાહી વધુ ઝડપથી આગળ વધી શકે છે અને તેનું રાજકીય તેમજ સામાજિક પ્રભાવ પણ ઊંડો રહેવાનો છે.
આ પણ વાંચો:રાજકોટમાં મેગા ડિમોલિશન શરૂ, જંગલેશ્વર વિસ્તારમાં 1,400થી વધુ ગેરકાયદેસર મિલકતો પર ફરશે બુલડોઝર
આ પણ વાંચો:રાજકોટના ધોરાજીમાં મેગા ડિમોલિશન કરી 3.70 કરોડની જમીન ખુલ્લી કરાઈ
