ECI Rajya Sabha Election Dates 2026: ભારતના ચૂંટણી પંચે રાજ્યસભા અને રાજ્ય વિધાન પરિષદની કુલ 27 બેઠકો માટે ચૂંટણી કાર્યક્રમ જાહેર કર્યો છે. આ ચૂંટણી પ્રક્રિયામાં વિવિધ રાજ્યોની રાજ્યસભાની બેઠકો માટે દ્વિવાર્ષિક ચૂંટણી તેમજ કેટલીક બેઠકો માટે પેટાચૂંટણી યોજાશે.ચૂંટણી પંચ દ્વારા જાહેર કરાયેલા કાર્યક્રમ મુજબ જો જરૂરી બનશે તો 18 જૂનના રોજ મતદાન યોજાશે અને તે જ દિવસે મતગણતરી પણ હાથ ધરાશે.

10 રાજ્યોની 24 રાજ્યસભા બેઠકો માટે ચૂંટણી

ચૂંટણી પંચના જણાવ્યા અનુસાર આંધ્ર પ્રદેશ, ગુજરાત, ઝારખંડ, મધ્ય પ્રદેશ, મણિપુર, મેઘાલય, રાજસ્થાન, અરુણાચલ પ્રદેશ અને કર્ણાટક સહિતના રાજ્યોની કુલ 24 રાજ્યસભા બેઠકો માટે દ્વિવાર્ષિક ચૂંટણી યોજાશે.આ ઉપરાંત મહારાષ્ટ્ર, તમિલનાડુ અને ઓડિશાની એક-એક રાજ્યસભા બેઠક માટે પેટાચૂંટણી પણ થશે.

ઉમેદવારી પ્રક્રિયા શરૂ

ચૂંટણી પ્રક્રિયા માટે ઉમેદવારી નોંધણી 1 જૂનથી શરૂ થઈ ગઈ છે. ઉમેદવારો 8 જૂન સુધી પોતાના ઉમેદવારીપત્ર દાખલ કરી શકશે.ઉમેદવારી પત્રોની ચકાસણી 9 જૂને કરવામાં આવશે, જ્યારે ઉમેદવારો 11 જૂન સુધી પોતાનું નામ પરત ખેંચી શકશે.

18 જૂને મતદાન (Election) અને મતગણતરી

જો બેઠકો પર એકથી વધુ ઉમેદવારો મેદાનમાં રહેશે તો 18 જૂને સવારે 8 વાગ્યાથી સાંજે 4 વાગ્યા સુધી મતદાન યોજાશે. મતદાન પૂર્ણ થયા બાદ સાંજે 5 વાગ્યાથી મતગણતરી શરૂ કરવામાં આવશે.

બિહાર અને કર્ણાટક વિધાન પરિષદ ચૂંટણી

ચૂંટણી પંચે બિહાર અને કર્ણાટકની વિધાન પરિષદની બેઠકો માટે પણ ચૂંટણીની જાહેરાત કરી છે. બિહારમાં 9 બેઠકો માટે ચૂંટણી યોજાશે, જ્યારે એક બેઠક માટે પેટાચૂંટણી પણ થશે. કર્ણાટકમાં 7 બેઠકો માટે મતદાન યોજાવાનું છે.

ચૂંટણી માટે તંત્ર તૈયાર

ચૂંટણી પંચે ચૂંટણી પ્રક્રિયા માટે રિટર્નિંગ ઓફિસર અને સહાયક રિટર્નિંગ ઓફિસરની નિમણૂક પણ કરી છે. સંબંધિત વિગતો સત્તાવાર ગેઝેટમાં પ્રકાશિત કરવામાં આવી છે. ચૂંટણીની જાહેરાત બાદ હવે વિવિધ રાજકીય પક્ષોએ ઉમેદવારો નક્કી કરવા અને ચૂંટણી રણનીતિ ઘડવાની પ્રક્રિયા તેજ કરી દીધી છે.

આ પણ વાંચો: 18મી જૂને 10 રાજ્યોની 24 બેઠકોની રાજ્યસભા ચૂંટણી, ગુજરાતમાં ચાર બેઠકો માટે થશે ચૂંટણી

આ પણ વાંચો: ભાજપ કેન્દ્રીય ચૂંટણી સમિતિએ રાજ્યસભા ચૂંટણી માટે ઉમેદવારોના નામ જાહેર કર્યા

આ પણ વાંચો: રાજ્યસભા ચૂંટણીમાં ભાજપના વર્ચસ્વ સામે કોંગ્રેસે આપી ટક્કર, 3 રાજ્યોના પરિણામ થયા જાહેર