રામાનંદ સાગરની ફેમસ ટીવી સીરિયલ ‘રામાયણ’ ફરી એકવાર ફેન્સ માટે ટીવી પર પરત ફરી રહી છે. શેમારૂ ટીવીએ જાહેરાત કરી છે કે પૌરાણિક શો 3જી જુલાઈ 2023થી ટેલિકાસ્ટ કરવાનું શરૂ કરશે. 80ના દાયકાના ટીવી શોમાં અરુણ ગોવિલ અને દીપિકા ચીખલિયાએ રામ અને સીતાના પાત્રો ભજવીને લોકોના દિલ પર રાજ કર્યું હતું. સુનીલ લાહિરીએ લક્ષ્મણની ભૂમિકા ભજવી હતી.
‘રામાયણ’નું પુનઃપ્રસારણ કરવાની જાહેરાત એવા સમયે કરવામાં આવી છે જ્યારે રામાનંદ સાગરની ‘રામાયણ’ની સરખામણી નવી ફિલ્મ ‘આદિપુરુષ’ સાથે કરવામાં આવી રહી છે. ‘આદિપુરુષ’, જે હિન્દુ મહાકાવ્ય ‘રામાયણ’ પર આધારિત હોવાનું કહેવાય છે, તેની આકરી ટીકા થઈ રહી છે. કહેવામાં આવી રહ્યું છે કે ફિલ્મમાં રામ, સીતા, હનુમાન અને રાવણને ખોટી રીતે દર્શાવવામાં આવ્યા છે. 16 જૂને સિનેમાઘરોમાં રિલીઝ થયેલી આ ફિલ્મમાં પ્રભાસ, કૃતિ સેનન, દેવદત્ત નાગે અને સૈફ અલી ખાન છે. તેનું નિર્દેશન ઓમ રાઉતે કર્યું છે.
ટીવી શોની એક ટૂંકી ક્લિપ શેર કરીને, ચેનલે તેના સોશિયલ મીડિયા પેજ પર પોસ્ટ કર્યું, ‘વિશ્વ પ્રસિદ્ધ પૌરાણિક ધારાવાહિક રામાયણ બધા ચાહકો અને અમારા દર્શકો માટે પાછી આવી છે. 3જી જુલાઈથી સાંજે 7:30 વાગ્યે ફક્ત તમારી મનપસંદ ચેનલ Shemaroo ટીવી પર જુઓ.
