યુક્રેન યુદ્ધ વચ્ચે રશિયાએ ભારતને સપાટીથી હવામાં માર કરતી ઈગ્લા એસ મિસાઈલ સપ્લાઈ કરી છે. ભારત ટૂંક સમયમાં હિમાલયમાં ચીન વિરુદ્ધ આ મિસાઈલ તૈનાત કરવા જઈ રહ્યું છે. આ મિસાઈલને ગમે ત્યાં સરળતાથી લઈ જઈ શકાય છે અને તેને ખભા પર રાખીને ફાયર કરી શકાય છે. તેના દ્વારા ફાઈટર જેટ, ડ્રોન અને ક્રુઝ મિસાઈલને નિશાન બનાવી શકાય છે. રશિયાએ આ મિસાઈલ એવા સમયે આપી છે જ્યારે ચીન અને ભારત વચ્ચે તણાવ ઘણો વધી ગયો છે. યુક્રેન યુદ્ધ વચ્ચે રશિયા અને ચીનની મિત્રતા કોઈ સીમા વગરની બની ગઈ છે. જાણકારોનું કહેવું છે કે ભારતને આ મિસાઈલ આપવાથી એ દર્શાવે છે કે ચીનની નજીક હોવા છતાં રશિયા ભારત સાથેની મિત્રતાને નબળી પાડવાનું નથી.
વર્ષ 2021 માં, ભારતીય સેનાએ પ્રથમ વખત સોવિયત-ડિઝાઇન કરેલી આ મિસાઇલનો ઉપયોગ કરવાનું શરૂ કર્યું. ચીન સાથે 4 વર્ષ જૂના તણાવ વચ્ચે ભારત આ શોલ્ડર ફાયર મિસાઈલને મોટા પાયે ખરીદી રહ્યું છે. વર્ષ 2020ની શરૂઆતમાં ગલવાન હિંસા દરમિયાન ઘણા ભારતીય જવાનો શહીદ થયા હતા. નિષ્ણાંતોનું કહેવું છે કે રશિયા દ્વારા આ મિસાઈલનું દાન બતાવે છે કે મિત્રતા હોવા છતાં ચીન હથિયારોના મુદ્દે ભારત સામે રશિયન નેતૃત્વને ઝુકાવી શક્યું નથી. ચીન ભારતને હથિયારો વેચવા બદલ રશિયાનો વિરોધ કરી રહ્યું છે, પરંતુ પુતિને સ્પષ્ટ કહ્યું છે કે તેઓ ડ્રેગનના સૂચનને સ્વીકારશે નહીં.
ઓબ્ઝર્વર રિસર્ચ ફાઉન્ડેશનના નંદન ઉન્નીકૃષ્ણને ન્યૂઝવીક મેગેઝિનને જણાવ્યું કે, ‘સામાન્ય લોકોને આ કરારની વાસ્તવિક શરતોની ખબર નથી, પરંતુ સામાન્ય અભિપ્રાય એ છે કે કોઈપણ હથિયાર આપતા પહેલા રશિયા તેના ઉપયોગને લઈને કોઈ શરતો લાદતું નથી.’ તેમણે કહ્યું કે અત્યાર સુધી રશિયા અને ચીનના સંબંધોથી ભારત અને રશિયા વચ્ચેની સંરક્ષણ ભાગીદારીને કોઈ અસર થઈ નથી. તાજેતરમાં ભારતે ફિલિપાઈન્સને બ્રહ્મોસ મિસાઈલ વેચી છે જે તેણે રશિયા સાથે મળીને બનાવી છે. ચીન ફિલિપાઈન્સ સાથે તણાવમાં છે અને મનીલાનો પણ અમેરિકા સાથે સંરક્ષણ કરાર છે.
દક્ષિણ ચીન સાગરમાં ઘમંડ દર્શાવી રહેલા ચીન સામે ફિલિપાઈન્સ ટૂંક સમયમાં બ્રહ્મોસ મિસાઈલ તૈનાત કરશે. ફિલિપાઈન્સના ભૂતપૂર્વ સંરક્ષણ પ્રધાન ડેલ્ફિન લોરેન્ઝાનાનું કહેવું છે કે વિશ્વની સૌથી ઝડપી ક્રૂઝ મિસાઈલ બ્રહ્મોસ તેમના દેશની સાર્વભૌમત્વ વિરુદ્ધ કોઈપણ ઉદ્ધતાઈનો જડબાતોડ જવાબ આપશે. તે જ સમયે, અમેરિકન પ્રોફેસર ક્રિસ્ટોફર ક્લેરીનું કહેવું છે કે ભારત રશિયા પર ચીનના વધતા પ્રભાવ અને તેના ભાવિ પ્રભાવથી ચિંતિત હોઈ શકે છે. તેમણે કહ્યું કે ભારતને ચિંતા થવી જોઈએ કે જો કોઈ મોટો સૈન્ય સંઘર્ષ થાય છે તો ચીન શસ્ત્ર સપ્લાય રોકવા માટે રશિયા પર પોતાનું તમામ દબાણ લાવી શકે છે.
આ પણ વાંચો: કોંગ્રેસ નેતા નાના પટોલેની કાર સાથે ટ્રક અથડાતા સર્જાયો ભયંકર અકસ્માત, ‘ઇરાદાપૂર્વક’ ટક્કરનો આક્ષેપ
આ પણ વાંચો: હરિયાણામાં સ્કૂલ બસ પલટી જતાં 5 બાળકોના મોત, 15થી વધુ લોકો ઘાયલ
આ પણ વાંચો: PM મોદીએ ચીન પર કહી મોટી વાત, સૌહાર્દપૂર્ણ સંબંધો ભારત સહિત વિશ્વ માટે પણ મહત્વના
