ભારતની ટેનિસ સ્ટાર સાનિયા મિર્ઝા અને તેની જોડીદાર યુક્રેનની નાદિયા કિચેનોકને એડિલેડ ઈન્ટરનેશનલ ટેનિસ ટૂર્નામેન્ટની સેમિફાઈનલ મેચમાં હારનો સામનો કરવો પડ્યો હતો. આ સાથે આ જોડી ટૂર્નામેન્ટમાંથી બહાર થઈ ગઈ છે. ઓસ્ટ્રેલિયન ટેનિસ સ્ટાર અને મહિલા નંબર વન જોડી એશલે બાર્ટી અને સ્ટોર્મ સેન્ડર્સ દ્વારા તેમનો પરાજ્ય થયો છે, એડિલેડ ઇન્ટરનેશનલ એ WTA 500 ટુર્નામેન્ટ છે.બાર્ટી અને સેન્ડર્સે સાનિયા અને કિચેનોકને 6-1, 2-6, 10-8થી હરાવ્યા હતા. મેચ એક કલાક અને પાંચ મિનિટ સુધી ચાલી હતી. સાનિયા અને કિચેનોકની જોડીને પ્રથમ સેટમાં કારમી હારનો સામનો કરવો પડ્યો હતો. આ પછી સાનિયા અને કિચેનોકે બીજા સેટમાં વાપસી કરી હતી અને 6-2થી જીત મેળવી હતી.
છેલ્લા સેટમાં બંને જોડી વચ્ચે જોરદાર સ્પર્ધા જોવા મળી હતી અને મેચ ટાઈ બ્રેકર સુધી પહોંચી હતી. ટાઈ બ્રેકરમાં કોઈ પરિણામ ન આવતા મેચ સુપર ટાઈ બ્રેકર પર પહોંચી હતી. જો કે, તે બાર્ટી અને સેન્ડર્સે જીતી હતી.તેમણે સેટની સાથે સાથે મેચ પણ જીતી લીધી હતી. આ પહેલા ક્વાર્ટર ફાઇનલમાં સાનિયા અને કિચેનોકે અમેરિકાની શેલ્બી રોજર્સ અને ગ્રેટ બ્રિટનની હીથર વોટસનને ત્રણ સેટની મેચમાં 6-0 1-6 10-5થી હરાવ્યા હતા.
પુરુષોમાં, રોહન બોપન્ના અને રામકુમાર રામનાથનની જોડી એડિલેડ ઇન્ટરનેશનલ 1 ATP 250 ટૂર્નામેન્ટની સેમિફાઇનલમાં પહોંચી હતી. તેણે મેન્સ ડબલ્સની ક્વાર્ટર ફાઇનલમાં બેન્જામિન બોન્ઝી અને હ્યુગો નાઇસને 6-1, 6-3થી હરાવ્યો હતો. બોપન્ના અને રામનાથન હવે શનિવારે સેમિફાઇનલમાં ટોમિસ્લાવ બાર્કિચ અને સેન્ટિયાગો ગોન્ઝાલેઝની જોડી સામે ટકરાશે.
