26 સપ્ટેમ્બર એટલે કે આજે ઈન્ટરનેશનલ ડોટર્સ ડેની ઉજવણી કરવામાં આવી છે. દરેક ખાસ દિવસને ઉજવતા સેલિબ્રિટીઝ ડોટર્સ ડે ઉજવવાનું કેમ ભૂલે. બોલિવુડના મહાનાયક અમિતાભ બચ્ચન, સોહા અલી ખાન, નીતૂ કપૂર, કુણાલ ખેમૂ, સુનીલ શેટ્ટી વગેરે જેવા સેલેબ્સે સોશિયલ મીડિયા અકાઉન્ટ પર પોતાની દીકરીઓ સાથેની તસવીરો કે વિડીયો શેર કરીને તેમને શુભકામના પાઠવી હતી. ત્યારે ગત વર્ષે જ દીકરીની મા બનેલી એક્ટ્રેસ શિલ્પા શેટ્ટીએ પણ પોતાની દીકરી સમિષાનો ક્યૂટ વિડીયો શેર કરીને ડોટર્સ ડેની શુભેચ્છા આપી છે.
શિલ્પા શેટ્ટીએ ગણેશોત્સવ દરમિયાન પોતાના ઘરે ગણપતિ લાવી હતી એ વખતનો વિડીયો તેણે શેર કર્યો છે. આ વિડીયોમાં તે દીકરી સાથે ગાદલા પર બેઠી છે અને તાળી પાડતી જોવા મળે છે. નાનકડી સમિષા પહેલા તો મમ્મીને જોવે છે પણ પછી પોતાની જ મસ્તીમાં ઉઠ-બેસ કરે છે ને તાળીઓ પાડે છે. શિલ્પા દીકરીને આમ કરતી જોઈને ખૂબ ખુશ થાય છે. આ ક્યૂટ વિડીયો શેર કરતાં શિલ્પાએ લખ્યું, “અમને, મારી અને તમારી સૌની દીકરીઓને ડોટર્સ ડેની શુભકામના. સમિષા મને પસંદ કરવા માટે આભાર. હું તને વચન આપું છું કે આપણે બંને ભલે મા-દીકરી છીએ પરંતુ આપણે દિલથી કાયમ મિત્રો બનીને રહીશું. લવ યુ માય બેબી.”
ઉપરાંત હાલ શ્રાદ્ધ પક્ષ ચાલી રહ્યો છે ત્યારે શિલ્પાએ પિતૃઓને વાસ નાખી હતી. શિલ્પા શેટ્ટીએ ઈન્સ્ટાગ્રામ સ્ટોરીમાં પોતાના સ્વર્ગસ્થ પિતા અને અન્ય સ્વર્ગસ્થ પરિવારજનોની તસવીરો શેર કરી હતી. શિલ્પાએ શ્રાદ્ધ માટે તૈયાર કરેલા ભોજનની વાસ નાખી હતી અને કાગડો ભોજન આરોગતો હોય તેવો વિડીયો શેર કર્યો હતો.
શિલ્પા શેટ્ટી છેલ્લા થોડા મહિનાથી પતિ રાજ કુંદ્રાના કારણે ચર્ચામાં છે. પોર્ન ફિલ્મો બનાવાના કેસમાં શિલ્પાના પતિ રાજ કુંદ્રાની જુલાઈ મહિનામાં ધરપકડ થઈ હતી. બે મહિના બાદ રાજના જામીન મંજૂર થતાં 21 સપ્ટેમ્બરે તે ઘરે આવ્યો હતો. રાજની ધરપકડ બાદ શિલ્પા શેટ્ટી ખૂબ ટ્રોલ થઈ હતી અને તેણે શૂટિંગ પણ બંધ કરી દીધું હતું. જોકે, થોડા અઠવાડિયાઓ બાદ શિલ્પાએ ફરી ડાન્સ રિયાલિટી શોનું શૂટિંગ શરૂ કર્યું હતું. હવે રાજ ઘરે આવી જતાં શિલ્પાએ ફરી સામાન્ય જીવન જીવવાનું શરૂ કર્યું છે.
