Surat Kakrapar Dam Drowning: સુરત જિલ્લાના માંડવી તાલુકામાંથી એક અત્યંત કરુણ અને આંખમાં આંસુ લાવી દે તેવી ઘટના સામે આવી છે. વાકલ ગામના એક જ પરિવારના ચાર આશાસ્પદ યુવાનો કાકરાપાર ડેમના ઊંડા પાણીમાં ડૂબી જતા મોતને ભેટ્યા છે. પશુઓને પાણી પીવડાવવા ગયેલા એક ભાઈનો પગ લપસી જતાં તેને બચાવવા માટે પાણીમાં પડેલા અન્ય ત્રણ પિતરાઈ ભાઈઓએ પણ પોતાનો જીવ ગુમાવ્યો છે. આ ગોઝારી ઘટનાને પગલે સમગ્ર ચૌધરી પરિવાર અને વાકલ ગામમાં અરેરાટી સાથે ભારે શોકનું મોજું ફરી વળ્યું છે.
Surat : પશુઓને પાણી પીવડાવવા જતાં સર્જાઈ હોનારત
પ્રાપ્ત વિગતો અનુસાર, ગત 11મી મેના રોજ બપોરના સમયે વાકલ ગામનો એક યુવક પશુઓને પાણી પીવડાવવા માટે કાકરાપાર ડેમના હેઠવાસના વિસ્તારમાં ગયો હતો. આ દરમિયાન ડેમના કિનારે અચાનક તેનો પગ લપસી જતાં તે ઊંડા પાણીમાં ગરકાવ થવા લાગ્યો હતો. મોડી સાંજ સુધી આ યુવક ઘરે પરત ન ફરતા પરિવારજનો ચિંતિત બન્યા હતા, જેથી તેના અન્ય ત્રણ પિતરાઈ ભાઈઓ તેને શોધવા માટે ડેમ કિનારે પહોંચ્યા હતા.
3 ભાઈઓએ પાણીમાં લગાવી છલાંગ
ડેમ કિનારે પોતાના ભાઈના કપડાં પડેલા જોઈને ત્રણેય ભાઈઓને અંદાજ આવી ગયો કે તે પાણીમાં ડૂબ્યો છે. પોતાના ભાઈનો જીવ બચાવવાની અધીરાઈમાં આ ત્રણેય ભાઈઓએ એક પછી એક પાણીમાં કૂદી પડ્યા હતા. પરંતુ પાણીનો પ્રવાહ તેજ હોવાને કારણે અને ઊંડાઈ વધુ હોવાથી, બચાવવા ગયેલા ત્રણેય ભાઈઓ પણ પાણીમાં ગરકાવ થઈ ગયા હતા અને ચારેય પિતરાઈ ભાઈઓના કરુણ મોત નીપજ્યા હતા.
વહેલી સવારે મળ્યા ચારેય ભાઈઓના મૃતદેહ
આ દુર્ઘટનામાં જીવ ગુમાવનાર યુવાનોના નામ સાહિલ જિતેન્દ્ર ચૌધરી, કોશિક જિતેન્દ્ર ચૌધરી, ગણેશ નાનસિંગ ચૌધરી અને પ્રવીણ બાલુ ચૌધરી છે. ઘટનાની જાણ થતાં જ માંડવી પોલીસ અને ફાયર વિભાગની ટીમ તાત્કાલિક ઘટનાસ્થળે દોડી આવી હતી, જોકે ગત સાંજે રાતનું અંધારું હોવાથી શોધખોળની કામગીરી અટકાવવી પડી હતી. ત્યારબાદ આજે (12મી મે) વહેલી સવારથી નગરપાલિકાના તરવૈયાઓએ ભારે જહેમત ઉઠાવીને કલાકોના ઓપરેશન બાદ ચારેય યુવાનોના મૃતદેહોને પાણીની બહાર કાઢ્યા છે.
ચૌધરી સમાજ અને વાકલ ગામમાં માતમ
એક જ પરિવારના ચાર જુવાનજોધ દીકરાઓના અકાળે અવસાનથી વાકલ ગામમાં ભારે આક્રંદ છવાયો છે. એક ભાઈને બચાવવાની હિંમત આખા પરિવાર માટે કાળમુખી સાબિત થઈ છે. હાલ માંડવી પોલીસે આ મામલે અકસ્માતે મોતનો ગુનો નોંધીને લાશોને પોસ્ટમોર્ટમ અર્થે મોકલી આગળની તપાસ હાથ ધરી છે.
આ પણ વાંચો: સુરત સિવિલ હોસ્પિટલની બેદરકારી! વ્હીલચેર ન મળતા ફ્રેક્ચર દર્દીને સગાઓએ ટેકો આપી ચલાવ્યો
આ પણ વાંચો: પોલીસ પર બંદૂક તાણવી ભારે પડી! સુરતમાં 50 લાખની લૂંટના આરોપીનું ‘હાફ એન્કાઉન્ટર’
આ પણ વાંચો: સુરતમાં 14 વર્ષની પાવરલિફ્ટર સાથે પિતરાઈ ભાઈની શરમજનક હરકત
