ભારતે પ્રથમ T20 મેચમાં આયર્લેન્ડને 2 રને હરાવ્યું છે. આ રીતે ભારતીય ટીમ 3 T20 મેચોની શ્રેણીમાં 1-0થી આગળ થઈ ગઈ છે. ભારતીય ટીમને જીતવા માટે 140 રનનો ટાર્ગેટ હતો. ટીમ ઈન્ડિયાએ 6.5 ઓવરમાં 2 વિકેટે 47 રન બનાવ્યા હતા, ત્યારબાદ વરસાદ આવ્યો હતો. આ વરસાદ બાદ રમત ફરી શરૂ થઈ શકી નથી. જો કે ભારતીય ટીમને ડકવર્થ લુઈસ નિયમ દ્વારા વિજેતા જાહેર કરવામાં આવી હતી.
ભારતીય કેપ્ટન જસપ્રિત બુમરાહે ટોસ જીતીને પ્રથમ બોલિંગ કરવાનો નિર્ણય કર્યો હતો. પ્રથમ બેટિંગ કરતા આયર્લેન્ડની ટીમે 7 વિકેટ ગુમાવીને 139 રન બનાવ્યા હતા. બેરી મેકકાર્થીએ સૌથી વધુ 51 રન બનાવ્યા હતા. કર્ટિસ કેમ્પરે 39 રન બનાવ્યા હતા. બુમરાહે ચાર ઓવરમાં 24 રન આપ્યા અને વાપસી મેચમાં બે વિકેટ લીધી. આ સાથે પ્રખ્યાત કૃષ્ણા અને રવિ બિશ્નોઈએ 2-2 વિકેટ લીધી હતી.
140 રનના લક્ષ્યનો પીછો કરવા ઉતરેલી ટીમ ઈન્ડિયાએ 6.5 ઓવરમાં 2 વિકેટ ગુમાવીને 47 રન બનાવ્યા હતા. આ પછી વરસાદના કારણે મેચમાં વિક્ષેપ પડ્યો હતો. યશસ્વી જયસ્વાલ 24 અને તિલક વર્મા શૂન્ય રને આઉટ થયા હતા. વરસાદ રોકવા માટે લાંબી રાહ જોવાઈ હતી, પરંતુ જ્યારે તે બંધ ન થયું, ત્યારે DLS દ્વારા ભારતને 2 રનથી વિજેતા જાહેર કરવામાં આવ્યું. રૂતુરાજ ગાયકવાડ 19 અને સંજુ સેમસને 1 રન બનાવીને અણનમ રહ્યા હતા.
અગાઉ T20માં રિંકુ સિંહ અને પ્રખ્યાત કૃષ્ણાને કેપ્ટન જસપ્રીત બુમરાહે ડેબ્યૂ કેપ આપી હતી. જસપ્રીત બુમરાહે આ મેચમાં જબરદસ્ત વાપસી કરી હતી. તેની પ્રથમ ઓવરમાં જ બે આયરિશ બેટ્સમેન પેવેલિયન પરત ફર્યા હતા. એન્ડ્રુ બલબિર્નીએ પ્રથમ બોલ પર ચોગ્ગો ફટકાર્યો. બીજા જ બોલ પર બુમરાહે બલબિર્નીને બોલ્ડ કર્યો. આ પછી બુમરાહે લોર્કન ટકરને વિકેટકીપર સંજુ સેમસનના હાથે કેચ આઉટ કરાવ્યો હતો. ટકર પોતાનું ખાતું પણ ખોલાવી શક્યો ન હતો.
