દિલ્હી મ્યુનિસિપલ કોર્પોરેશન (સુધારા) અધિનિયમ, 22 મેથી અમલમાં આવશે. આ સાથે જ દિલ્હીની ત્રણેય મ્યુનિસિપલ કોર્પોરેશનો (ઉત્તર DMC, દક્ષિણ DMC અને પૂર્વ DMC) એક જ એન્ટિટીમાં મર્જ થઈ જશે. જે સંયુક્ત રીતે દિલ્હી મ્યુનિસિપલ કોર્પોરેશન તરીકે ઓળખાશે. ગૃહ મંત્રાલયે આ અંગે એક નોટિફિકેશન બહાર પાડ્યું છે.
જ્યાં સુધી દિલ્હી મ્યુનિસિપલ કોર્પોરેશનની ચૂંટણી નહીં થાય ત્યાં સુધી તેની કમાન રાજકીય વ્યક્તિની જગ્યાએ નોકરિયાતના હાથમાં રહેશે. હવે ભારત સરકાર દિલ્હી મ્યુનિસિપલ કોર્પોરેશન માટે એક વિશેષ અધિકારીની નિમણૂક કરશે, જે કોર્પોરેશનના તમામ કાર્યોને નિભાવવા માટે જવાબદાર હશે. રાજ્યસભામાં દિલ્હી મ્યુનિસિપલ કોર્પોરેશન એક્ટ એમેન્ડમેન્ટ બિલનો જવાબ આપતી વખતે કેન્દ્રીય ગૃહ મંત્રીએ જાહેરાત કરી હતી કે કોઈ પણ રાજકીય વ્યક્તિને દિલ્હી મ્યુનિસિપલ કોર્પોરેશનનો પ્રશાસક બનાવવામાં આવશે નહીં. આ રીતે વહીવટદાર તરીકે એક અમલદાર મહાનગરપાલિકાની કમાન સંભાળશે.
પાંચ વર્ષ પહેલા ત્રણ મહાનગરપાલિકાના 272 વોર્ડની રચના વખતે અંદાજે 50 હજારની વસ્તીનો સમાવેશ કરવામાં આવ્યો હતો. કેન્દ્ર સરકારે દિલ્હી મ્યુનિસિપલ કોર્પોરેશન એક્ટમાં સુધારા બિલમાં વોર્ડની સંખ્યા 272 થી ઘટાડીને મહત્તમ 250 કરી દીધી છે. કેન્દ્રીય ગૃહ પ્રધાન અમિત શાહે દિલ્હી મ્યુનિસિપલ કોર્પોરેશનમાં વધુમાં વધુ 250 વોર્ડ બનાવવાનો ઈરાદો જાહેર કરતાં જણાવ્યું હતું કે હાલમાં દિલ્હીમાં લગભગ બે કરોડની વસ્તી છે અને તેને 250 વોર્ડમાં વહેંચવામાં આવશે. તેથી એક વોર્ડમાં 80 હજારની વસ્તીનો સમાવેશ કરવામાં આવશે.