ઉત્તર પ્રદેશના મુરાદાબાદના ઉદ્યોગપતિ ડૉ.અરવિંદ કુમાર ગોયલે પોતાની સમગ્ર સંપત્તિ ગરીબો માટે દાન કરી દીધી છે. પ્રોપર્ટીની કુલ કિંમત 600 કરોડ રૂપિયાની આસપાસ છે. ગોયલે પોતાની પાસે માત્ર મુરાદાબાદ સિવિલ લાઇન્સમાં કોઠી રાખી છે. તેમણે આ પ્રોપર્ટી 50 વર્ષની મહેનતથી બનાવી છે.
ગોયલે રાજ્ય સરકારને સીધું દાન આપ્યું છે. જેથી જરૂરિયાતમંદો સુધી મદદ પહોંચી શકે. તેમની પાસે ઉત્તર પ્રદેશ, રાજસ્થાન, મહારાષ્ટ્ર સહિત ઘણા રાજ્યોમાં 100 થી વધુ શૈક્ષણિક સંસ્થાઓ, વૃદ્ધાશ્રમ અને હોસ્પિટલો છે. કોવિડ લોકડાઉન દરમિયાન પણ તેમણે મુરાદાબાદના 50 ગામોને દત્તક લઈને લોકોને મફત ભોજન અને દવા આપી હતી.
નિર્ણયમાં પત્ની અને બાળકોએ પણ સાથ આપ્યો હતો
ડો. ગોયલના પરિવારમાં તેમની પત્ની રેણુ, બે પુત્રો અને એક પુત્રી છે. તેમનો મોટો પુત્ર મધુર ગોયલ મુંબઈમાં રહે છે. નાનો પુત્ર શુભમ પ્રકાશ ગોયલ મુરાદાબાદમાં રહે છે અને તેમના પિતાને બિઝનેસમાં મદદ કરે છે. લગ્ન બાદ પુત્રી બરેલીમાં રહે છે. તેમના બાળકો અને પત્નીએ તેમના નિર્ણયને આવકાર્યો છે.
ડૉ.ગોયલે સોમવારે રાત્રે મિલકત દાન કરવાની જાહેરાત કરી હતી. આ પછી મીડિયા સાથેની વાતચીતમાં તેમણે કહ્યું કે 25 વર્ષ પહેલા મેં મારી પ્રોપર્ટી દાન કરવાનો નિર્ણય કર્યો હતો. ત્યારે બનેલી એક ઘટનાનો ઉલ્લેખ કરતાં તેમણે કહ્યું, “તે ડિસેમ્બરનો મહિનો હતો. હું ટ્રેનમાં ચડ્યો કે તરત જ એક ગરીબ માણસ ઠંડીથી ધ્રૂજતો જોવા મળ્યો. તેના પગમાં ન તો ચાદર હતી કે ન તો ચપ્પલ. તે માણસને જોઈને , હું ચોંકી ગયો. હું મારી જાતને રોકી ન શક્યો. મેં મારા ચંપલ ઉતારીને તેને આપ્યાં. મેં થોડો સમય સહન કર્યું. પણ સખત ઠંડીને કારણે મારી હાલત પણ ખરાબ થવા લાગી.”
ડૉ. ગોયલ ઉમેરે છે, “તે દિવસે મેં વિચાર્યું કે કેટલા લોકો આના જેવી ઠંડીમાં રહેતા હશે. ત્યારથી મેં ગરીબ અને નિરાધારોને મદદ કરવાનું શરૂ કર્યું. હવે હું ઘણો આગળ વધી ગયો છું. જીવનનો કોઈ ભરોસો નથી.મારી મિલકતનો ઉપયોગ અનાથ, ગરીબ અને નિરાધાર લોકો માટે થઈ શકે તે માટે મેં મારી મિલકત દાન કરવા માટે જિલ્લા વહીવટીતંત્રને પત્ર લખ્યો છે. તેઓ આગળની કાર્યવાહી કરશે.”
