Monkey Pox Vaccine: કોવિડ-19 પછી હવે વિશ્વમાં મંકીપોક્સના કેસ વધી રહ્યા છે. વર્લ્ડ હેલ્થ ઓર્ગેનાઈઝેશને પણ આને ધ્યાનમાં રાખીને વૈશ્વિક સ્વાસ્થ્ય ઈમરજન્સી જાહેર કરી છે. પરંતુ આ બધાની વચ્ચે એવી માહિતી સામે આવી છે કે ડેનમાર્કની એક કંપનીએ મંકીપોક્સની રસી બનાવી છે. જો કે, હજુ સુધી તેના સંલગ્ન ડેટા વિશે કોઈ માહિતી ઉપલબ્ધ નથી. પરંતુ આ રસીને યુરોપિયન યુનિયનમાં મંજૂરી આપવામાં આવી છે. આ પછી આ રસી વિશે સમગ્ર વિશ્વમાં ચર્ચા તેજ થઈ ગઈ છે. વર્લ્ડ હેલ્થ ઓર્ગેનાઈઝેશનના ચીફ સાયન્ટિસ્ટ ડૉ. સૌમ્યા વિશ્વનાથન કહે છે કે આનાથી સંબંધિત ડેટા એકત્રિત કરવાની જરૂર છે. રસી બનાવનારી કંપનીનું નામ બાવેરિયન નોર્ડિક છે. એવું માનવામાં આવે છે કે આ રસીની અસરકારકતાના ડેટાની તપાસ માટે ટૂંક સમયમાં કામ શરૂ કરવામાં આવી શકે છે.
ડૉ. વિશ્વનાથને એનડીટીવીને આપેલા ઈન્ટરવ્યુમાં સ્મોલ પોક્સ રસીકરણ અભિયાન બંધ થવા અંગે પણ ચિંતા વ્યક્ત કરી છે. તેમણે કહ્યું કે વર્ષ 1979-80 પછી શીતળાના નિવારણ માટે રસીકરણ અભિયાન બંધ કરવામાં આવ્યું હતું. વાસ્તવમાં મંકી પોક્સ ઓર્થોપોક્સ વાયરસ જીનસ પરિવારનો સભ્ય છે. તે શીતળા સાથે ઘણી સામ્યતા ધરાવે છે. 1980 માં એવી જાહેરાત કરવામાં આવી હતી કે સ્મોલ પોક્સ વાયરસ વિશ્વમાંથી નાબૂદ થઈ ગયો છે. આ પછી રસીકરણ અભિયાન પણ બંધ કરી દેવામાં આવ્યું હતું. વર્લ્ડ હેલ્થ ઓર્ગેનાઈઝેશનની વેબસાઈટ અનુસાર, સ્મોલ પોક્સમાં અસરકારક રસી મંકી પોક્સ સામે પણ રક્ષણ આપે છે. વિશ્વનાથન એમ પણ કહે છે કે સ્મોલ પોક્સમાં વપરાતી રસી મંકી પોક્સ માટે પણ અસરકારક સાબિત થઈ શકે છે. વિશ્વનાથને વેક્સીન ઉત્પાદન માર્કેટિંગ અને વિતરણમાં ભારતીય ફાર્મા કંપનીઓની મહત્વપૂર્ણ ભૂમિકા વર્ણવી છે. આ કંપનીઓમાં વિશ્વની સૌથી મોટી રસી બનાવનારી ભારતીય કંપની સીરમ ઈન્સ્ટિટ્યૂટ ઓફ ઈન્ડિયાનું નામ પણ સામેલ છે.
ડેનમાર્કની મંકી પોક્સ રસી એ Imvanex રસી છે. ન્યૂઝ એજન્સી રોઇટર્સના રિપોર્ટ અનુસાર યુરોપિયન યુનિયને સોમવારે જ મંકીપોક્સ સામે આ રસીનો ઉપયોગ કરવાની મંજૂરી આપી છે. આ રસીને યુરોપિયન મેડિસિન એજન્સી દ્વારા મંજૂરી આપવામાં આવી છે. એક મીડિયા રિપોર્ટ અનુસાર, ભારતમાં મંકીપોક્સના કેસનો સામનો કરવા માટે સીરમ ઈન્સ્ટિટ્યૂટ ઓફ ઈન્ડિયા બાવેરિયન નોર્ડિક સાથે રસીના કેટલાક કન્સાઈનમેન્ટ આયાત કરવા માટે વાતચીત કરી રહી છે. SIIના મુખ્ય કાર્યકારી અધિકારી અદાર પૂનાવાલાએ મંગળવારે આ માહિતી આપી છે.