UPSC એ CSE મુખ્ય 2020 અંતિમ પરીક્ષાનું પરિણામ જાહેર કર્યું છે. યુનિયન પબ્લિક સર્વિસ કમિશન દ્વારા દેશની અમલદારશાહીમાં નિમણૂક માટે કુલ 761 ઉમેદવારોની ભલામણ કરવામાં આવી છે. શુભમ કુમારે સિવિલ સર્વિસ પરીક્ષા 2020 માં ટોપ કર્યું છે. તે જ સમયે, જાગૃતિ અવસ્થી અને અંકિતા જૈને સિવિલ સર્વિસ પરીક્ષામાં અનુક્રમે બીજા અને ત્રીજા ક્રમે સ્થાન મેળવ્યું છે. ઉમેદવારો upsc.gov.in પર મેરીટ યાદી ચકાસી શકે છે.
ગુજરાતના કાર્તિક જીવાણીએ 8 મો રેન્ક પ્રાપ્ત કર્યુ
UPSC દ્વારા સિવિલ સર્વિસીઝની મુખ્ય પરીક્ષાનું હાલમાં જ પરિણામ જાહેર કરવામાં આવ્યું છે. જેમાં IAS, IFS, IPS, કેન્દ્રીય સેવાઓ ગ્રુપ A અને ગ્રુપ B ના ઉમેદવારોનું પરિણામ જાહેર કરવામાં આવ્યું છે. UPSC દ્વારા જાહેર કરાયેલા પરિણામમાં સુરત શહેરના કાર્તિક નાગજીભાઈ જીવાણીએ ઓલ ઈન્ડિયા રેન્કિંગમાં 8 મો રેન્ક સાથે અદભુત સિદ્ધિ મેળવી તેમજ ગુજરાતનું પણ નામ રોશન કર્યું છે.
કાર્તિકના પિતા ડો. નાગજીભાઈ જીવાણી શહેરના વરાછા વિસ્તારમાં લેબોરેટરી ચલાવે છે. કાર્તિકે સુરતની જ પીપી સવાણી અને રાયન ઈન્ટરનેશનલ સ્કૂલમાં 12 માં ધોરણ સુધી અભ્યાસ કર્યા બાદ IIT મુંબઈથી મિકેનિકલમાં બીટેકની પદવી પ્રાપ્ત કરી છે. કાર્તિકે પ્રાથમિક શિક્ષણ માતૃભાષામાં મેળવ્યું છે.
સુરતનો પ્રથમ IAS બનશે
UPSCના પરિણામોમાં સુરતનો કાર્તિક નાગજીભાઈ જીવાણીએ ભારતમાં 8મો ક્રમ અને ગુજરાતમાં પ્રથમ રેન્ક પ્રાપ્ત કર્યો છે. તેની ઈચ્છા મુજબ જો તેને IAS કેડર મળશે તો તે સુરતનો પ્રથમ IAS અધિકારી બનશે.
પરિણામની સૂચનામાં જણાવાયું છે કે યુનિયન પબ્લિક સર્વિસ કમિશન દ્વારા જાન્યુઆરી, 2021 માં લેવાયેલી સિવિલ સર્વિસિસ પરીક્ષા, 2020 ના લેખિત ભાગ અને ઇન્ટરવ્યૂના પરિણામના આધારે ઉમેદવારો યોગ્યતાના ક્રમમાં નિમણૂક માટે આ પદ માટે કુલ 761 ઉમેદવારોની ભલામણ કરવામાં આવી છે. આ પરિણામ દ્વારા ભારતીય વહીવટી સેવા; ભારતીય વિદેશ સેવા; ભારતીય પોલીસ સેવા; અને કેન્દ્રીય સેવાઓ, જૂથ ‘A’ અને જૂથ ‘B’ ની નિમણૂક માટે ભલામણ કરવામાં આવી છે.
યુનિયન પબ્લિક સર્વિસ કમિશન દ્વારા આપવામાં આવેલી માહિતી અનુસાર, શુભમ કુમારે સિવિલ સર્વિસ પરીક્ષા 2021 (CSE) માં પ્રથમ સ્થાન મેળવ્યું છે. તેણે IIT બોમ્બેમાંથી BTech (સિવિલ એન્જિનિયરિંગ) નો અભ્યાસ કર્યો છે. તે જ સમયે, એકંદરે બીજો ક્રમ મેળવનાર જાગૃતિ અવસ્થી, મહિલા ઉમેદવારોમાં ટોપર છે. તેમણે એમ.એન.આઇ.ટી., ભોપાલમાંથી બી.ટેક (ઇલેક્ટ્રિકલ એન્જિનિયરિંગ) કર્યું છે.
મેરિટ યાદીમાંથી ટોચના 25 ઉમેદવારોમાં 13 પુરુષો અને 12 મહિલાઓનો સમાવેશ થાય છે. નાગરિક સેવાઓ માટે ભલામણ કરાયેલા ઉમેદવારોમાં બેંચમાર્ક વિકલાંગતા ધરાવતા 25 ઉમેદવારોનો પણ સમાવેશ થાય છે. તેમાંથી 07 શારીરિક વિકલાંગ, 04 દૃષ્ટિહીન, 10 બહેરા અને 04 બહુવિધ વિકલાંગતા શ્રેણીમાંથી છે. તે જ સમયે, વચગાળાના ધોરણે 151 ઉમેદવારોની પસંદગી કરવામાં આવી છે. પસંદગી યાદીમાં તેમની યાદી અલગથી દર્શાવવામાં આવી છે
ઉમેદવારો સત્તાવાર વેબસાઇટ- https://www.upsconline.nic.in/ ની મુલાકાત લો.
સિવિલ સેવાઓ (મુખ્ય) પરીક્ષા, 2020- અંતિમ પરિણામ’ લિંક પર ક્લિક કરો.
પસંદ કરેલા ઉમેદવારોની યાદી સાથેની PDF ફાઇલ સ્ક્રીન પર દેખાશે.
CSE મુખ્ય પરિણામ ડાઉનલોડ કરો, વધુ સંદર્ભ માટે પ્રિન્ટ આઉટ લો.
પરીક્ષા ત્રણ તબક્કામાં લેવામાં આવે છે
આઈએએસ, આઈપીએસ, આઈએફએસ, આઈઆરએસ અને આઈઆરટીએસ સહિત વિવિધ અખિલ ભારતીય સેવાઓ અને કેન્દ્રીય સિવિલ સેવાઓમાં વહીવટી પદ માટે ઉમેદવારોને પસંદ કરવા માટે પ્રારંભિક, મુખ્ય અને ઇન્ટરવ્યુ નામના ત્રણ તબક્કામાં ભરતી પરીક્ષા દર વર્ષે લેવામાં આવે છે.
