શિવસેનાના બળવાખોર જૂથના નેતા એકનાથ શિંદે ભાજપને સમર્થન આપ્યા બાદ મહારાષ્ટ્રના મુખ્યમંત્રી બન્યા છે. જયારે રાજ્યના પૂર્વ મુખ્યમંત્રી દેવેન્દ્ર ફડણવીસે નાયબ મુખ્યમંત્રી તરીકે શપથ લીધા છે. એકનાથ શિંદે સીએમ બન્યા બાદ એનસીપી ચીફ શરદ પવારની પ્રતિક્રિયા સામે આવી છે.
પ્રેસને સંબોધતા શરદ પવારે કહ્યું કે કોઈએ કલ્પના પણ નહોતી કરી કે એકનાથ શિંદે મહારાષ્ટ્રના સીએમ બનશે. પવારે કહ્યું કે કદાચ બળવાખોર ધારાસભ્યોની આવી માંગ હશે તો જ શિંદેને મુખ્યમંત્રીની ખુરશી મળી છે. એકનાથ શિંદે વિશે બોલતા પવારે કહ્યું કે તેઓ થાણેમાં ખૂબ જ લોકપ્રિય છે. તેણે ત્યાં પણ સારું કામ કર્યું છે. જોકે તેમનું મૂળ ગામ સતારા જિલ્લામાં છે. પવારે કહ્યું કે મહારાષ્ટ્રના પ્રથમ મુખ્યમંત્રી યશવંતરાવ ચવ્હાણ પણ સતારાના હતા.
ઉલ્લેખનીય છે કે બીજેપી નેતા દેવેન્દ્ર ફડણવીસે પ્રેસ કોન્ફરન્સ દરમિયાન એકનાથ શિંદેનું નામ આગળ કર્યું હતું. તેમણે કહ્યું હતું કે એકનાથ શિંદેને મહારાષ્ટ્રના નવા મુખ્યમંત્રી બનાવવામાં આવશે. તે સમયે ફડણવીસે પોતાને નવી સરકારથી દૂર રાખ્યા હતા. તેમની તરફથી સ્પષ્ટ કહેવામાં આવ્યું હતું કે તેઓ આ સરકારમાં જોડાશે નહીં. જો કે થોડા જ કલાકોમાં ફરી સમીકરણો બદલાઈ ગયા અને દેવેન્દ્ર ફડણવીસ રાજ્યના ડેપ્યુટી સીએમ બન્યા. એવું કહેવામાં આવ્યું હતું કે ભાજપ અધ્યક્ષ જેપી નડ્ડાએ ફડણવીસને મનાવવાનું કામ કર્યું હતું. તેમણે પોતે ફડણવીસ સાથે વાત કરી અને તેમને સરકારમાં સામેલ થવા કહ્યું.
