World News : મધ્ય પૂર્વમાં વધતા તણાવ વચ્ચે હવે યમન તરફથી વધુ એક મહત્વપૂર્ણ દરિયાઈ માર્ગને લઈને ચેતવણી આપવામાં આવી છે. યમનના અંસારુલ્લાહ (હુથી) આંદોલનના એક નેતાએ નિવેદન આપ્યું છે કે જો સાઉદી અરેબિયા દ્વારા યમનના ઈન્ફ્રાસ્ટ્રક્ચર પર હુમલા ચાલુ રહેશે તો બાબ અલ-મંડેબ(Yemen Bab al-Mandeb) જળમાર્ગને નિશાન બનાવવાની કાર્યવાહી થઈ શકે છે. આ નિવેદન બાદ વૈશ્વિક એનર્જી માર્કેટ અને શિપિંગ ઉદ્યોગમાં ચિંતા વધી છે.
આ ધમકી એવા સમયે સામે આવી છે જ્યારે પશ્ચિમ એશિયામાં પહેલેથી જ તણાવપૂર્ણ સ્થિતિ છે અને હોર્મુઝ જળમાર્ગને લઈને પણ અનિશ્ચિતતા યથાવત છે. એનર્જી બજારના વિશ્લેષકો માને છે કે જો બંને વ્યૂહાત્મક જળમાર્ગોમાં અવરોધ સર્જાય તો આંતરરાષ્ટ્રીય બજારમાં કાચા તેલના (Crude Oil) ભાવમાં નોંધપાત્ર વધારો થઈ શકે છે. કેટલાક અંદાજોમાં ભાવ 200 ડોલર પ્રતિ બેરલ સુધી પહોંચવાની સંભાવના પણ વ્યક્ત કરવામાં આવી છે, જોકે આ માત્ર સંભવિત પરિસ્થિતિ આધારિત અંદાજ છે.
બાબ અલ-મંડેબ જળમાર્ગ શા માટે મહત્વનો છે?
બાબ અલ-મંડેબ (Yemen Bab al-Mandeb) જળમાર્ગ લાલ સમુદ્રને(Red Sea) અદનની ખાડી(Gulf of Aden) અને હિંદ મહાસાગર સાથે જોડે છે. આ માર્ગ સ્વેઝ નહેર તરફ જતાં જહાજો માટે મુખ્ય પ્રવેશદ્વાર માનવામાં આવે છે. વિશ્વના કુલ દરિયાઈ વેપારનો અંદાજે 10થી 12 ટકા હિસ્સો આ માર્ગ પરથી પસાર થાય છે, જેમાં મોટી માત્રામાં કાચા તેલ અને અન્ય ઊર્જા ઉત્પાદનોનો સમાવેશ થાય છે.
ભારત પર શું અસર થઈ શકે?
ભારત પોતાની કાચા તેલની જરૂરિયાતનો મોટો ભાગ આયાત દ્વારા પૂરો કરે છે અને પશ્ચિમ એશિયાથી આવતું તેલ આ દરિયાઈ માર્ગો પર નિર્ભર રહે છે. ઉપરાંત ભારતમાંથી યુરોપ અને અન્ય દેશોમાં જતો મોટો નિકાસ વેપાર પણ સ્વેઝ નહેર અને બાબ અલ-મંડેબ માર્ગ પરથી પસાર થાય છે.
જો આ માર્ગમાં લાંબા સમય સુધી અવરોધ સર્જાય તો તેલના ભાવમાં વધારો, શિપિંગ ખર્ચમાં વૃદ્ધિ, માલસામાનની ડિલિવરીમાં વિલંબ અને વૈશ્વિક સપ્લાય ચેન પર અસર જોવા મળી શકે છે. તેની સીધી અસર ભારતના વેપાર, મોંઘવારી અને ઊર્જા ખર્ચ પર પણ પડી શકે છે.
હાલ સ્થિતિ શું છે?
હાલ બાબ અલ-મંડેબ જળમાર્ગ સત્તાવાર રીતે બંધ કરવામાં આવ્યો નથી. યમન તરફથી આપવામાં આવેલી ચેતવણીને કારણે આંતરરાષ્ટ્રીય સ્તરે સ્થિતિ પર નજીકથી નજર રાખવામાં આવી રહી છે. આગામી દિવસોમાં ક્ષેત્રની સુરક્ષા પરિસ્થિતિ અને રાજદ્વારી પ્રયાસોના આધારે સ્થિતિ વધુ સ્પષ્ટ થશે.
આ પણ વાંચો: ઈરાની મિસાઇલ હુમલાથી UAEના ટેન્કરોને નુકસાન, ભારતીય ક્રૂ મેમ્બરનું મોત
આ પણ વાંચો: ઈરાનના 140 સૈન્ય ઠેકાણાઓ પર હુમલાનો અમેરિકાનો દાવો, જવાબમાં ઈરાને જવાબી કાર્યવાહી કર્યાનો દાવો
આ પણ વાંચો: ટ્રમ્પની ઈરાનને ખુલ્લી ધમકી: ‘મને મારવાની કોશિશ કરશો તો ઈરાન તબાહ કરી દઈશું’
