અફઘાનિસ્તાનના બલ્ખ પ્રાંતના મઝારશરીફ શહેરમાં એક મસ્જિદમાં થયેલા વિસ્ફોટમાં ઓછામાં ઓછા 20 લોકો માર્યા ગયા અને ઘણા ઘાયલ થયા. મઝાર-એ-શરીફના સૂત્રોએ જણાવ્યું હતું કે વિસ્ફોટ શહેરના વ્યસ્ત વિસ્તાર સેહ ડોકનની મસ્જિદમાં થયો હતો. સ્થાનિક મીડિયા અનુસાર, ઓછામાં ઓછા 20 મૃતદેહો અને 65 ઘાયલ ઉપાસકોને અબુ અલી સિના બલ્ખી હોસ્પિટલમાં લાવવામાં આવ્યા છે.
કાબુલમાં રોડ કિનારે થયેલા વિસ્ફોટમાં બે બાળકો ઘાયલ
અફઘાનિસ્તાનની રાજધાની કાબુલમાં રોડ કિનારે થયેલા વિસ્ફોટમાં બે બાળકો ઘાયલ થયા છે. કાબુલ પોલીસના પ્રવક્તા ખાલેદ ઝદરાને એક ટ્વીટમાં જણાવ્યું હતું કે, વિસ્ફોટ પશ્ચિમ કાબુલમાં એક રસ્તાના એક અલગ ભાગમાં થયો હતો. જોકે અહીં આસપાસ શિયા પ્રભુત્વ ધરાવતા વિસ્તારો છે. વિસ્ફોટની જવાબદારી તાત્કાલિક કોઈ સંગઠને લીધી નથી.
બે દિવસ પહેલા આ જ વિસ્તારમાં શૈક્ષણિક સંસ્થાઓને નિશાન બનાવીને અનેક વિસ્ફોટ કરવામાં આવ્યા હતા. આ બોમ્બ વિસ્ફોટોમાં ઓછામાં ઓછા છ બાળકો માર્યા ગયા અને 17 અન્ય ઘાયલ થયા. આ વિસ્ફોટો કાબુલ નજીકના શિયા પ્રભુત્વ ધરાવતા વિસ્તાર દશ્ત-એ-બરચીમાં અબ્દુલ રહીમ શહીદ હાઈસ્કૂલની અંદર અને મુમતાઝ એજ્યુકેશન સેન્ટર પાસે થયા હતા. સાક્ષીઓએ જણાવ્યું હતું કે, આત્મઘાતી બોમ્બરે આઈસા સ્કૂલની અંદર પોતાની જાતને ઉડાવી દીધી હતી. શાળામાં લગભગ 1000 વિદ્યાર્થીઓ અભ્યાસ કરે છે.
ખોરાસાન પ્રાંતમાં ઇસ્લામિક સ્ટેટ-સંલગ્ન ISએ ભૂતકાળમાં, ખાસ કરીને શિયા પ્રભુત્વ ધરાવતા વિસ્તારોમાં શાળાઓને નિશાન બનાવી હુમલા કર્યા છે.
તાલિબાનના દાવા પર સવાલો ઉભા થયા છે
ગયા વર્ષે ઓગસ્ટમાં સત્તા સંભાળ્યા બાદથી તાલિબાન દાવો કરી રહ્યાં છે કે તેમણે દેશને સુરક્ષિત કરી લીધો છે, પરંતુ આંતરરાષ્ટ્રીય એજન્સીઓ અને વિશ્લેષકો તાલિબાનના દાવા પર સવાલ ઉઠાવી રહ્યાં છે. આંતરરાષ્ટ્રીય વિશ્લેષકો કહે છે કે અફઘાનિસ્તાનમાં આતંકવાદના પુનરુત્થાનનું જોખમ રહેલું છે અને ઇસ્લામિક સ્ટેટ આતંકવાદી જૂથે અનેક મોટા હુમલાઓનો દાવો કર્યો છે.
