ખેડા પાસે એસ.ટી.બસ અને આઈશર વચ્ચે અકસ્માત

Accident/ ખેડા પાસે એસ.ટી.બસ અને આઈશર વચ્ચે અકસ્માત

આઈશરનું કેબીન દબાઈ જતા ચાલકને ગંભીર ઇજાઓ પહોંચતા હોસ્પિટલમાં ખસેડાયો

(હેમંત દેસાઈ – પ્રતિનિધિ, માતર)

ખેડા પાસે આવેલ સોખડા જલારામ મંદિર પાસે એસ.ટી.બસ અને આઈશર વચ્ચે અકસ્માત સર્જાતા આઈશર ચાલકને શરીર પર ગંભીર ઇજાઓ પહોંચતા સારવાર અર્થે હોસ્પિટલમાં ખસેડવામાં આવ્યો હતો. એસ.ટી. બસના ચાલકે માતર પોલીસ મથકમાં આઈશર ચાલક વિરુદ્ધમાં ફરિયાદ નોંધાવી હોવાનું જાણવા મળેલ છે.

પોલીસ સૂત્રોના જણાવ્યા અનુસાર ખંભાત ડેપોની એસ.ટી.બસ નંબર GJ-18-Z-8702ના ચાલક રાકેશભાઈ મૂળશંકર પાઠક (રહે.બામણગામ તા.માતર જી.ખેડા) અમદાવાદથી તારાપુર ચિતરવાડા લોકલ બસ લઈ સાંજે 6:30 કલાકે ખેડાથી માતર તરફ પસાર થઈ રહ્યા હતા. ત્યારે સોખડા જલારામ મંદિર સામે એક આઈશર ગાડી નંબર GJ-07-VW-8351ના ચાલકે પુરઝડપે, ગફલત ભરી રીતે હંકારી લાવી એસ.ટી.ની ડ્રાઇવર સાઈડ પર જોરદાર અથડાવી અકસ્માત કરતા બસનો આગળનો કાચ અને બમ્પરને નુકસાન પહોંચાડયું હતું.

જો કે સદનસીબે એસ.ટી.બસના ચાલક તેમજ મુસાફરોને કોઈ ઇજા પહોંચી ન હતી. પરંતુ આઈશરનું કેબીન દબાઈ જતા ચાલક તેમાં ફસાઈ ગયો હતો. અકસ્માતની જાણ થતાં આજુબાજુના લોકોએ ચાલકને બહાર કાઢ્યો હતો. આઈશર ચાલકના બંને પગે અને માથાના ભાગે ગંભીર ઇજાઓ પહોંચતા સારવાર અર્થે 108માં હોસ્પિટલમાં ખસેડવામાં આવ્યો હતો. માતર પોલીસ આ અકસ્માતની વધુ તપાસ ચલાવી રહ્યાં છે.