કેનેડાના એમેઝોન વેરહાઉસમાંથી કરોડોની ચોરી,5 ગુજરાતી ઝડપાયા

Canada News: કેનેડામાં એમેઝોન (Amazon)ના વેરહાઉસમાંથી કરોડોની ચોરીનો એક મોટો કેસ સામે આવ્યો છે. એજેક્સ (Ajax), ઓન્ટારિયોમાં આવેલા એમેઝોન ફુલફિલમેન્ટ સેન્ટરમાંથી આશરે 2 મિલિયન ડોલર (લગભગ ₹18.5 કરોડ)ની કિંમતની વસ્તુઓની ચોરી કરવા બદલ 2 મહિલા સહિત કુલ 5 ગુજરાતીઓની ધરપકડ કરવામાં આવી છે.

એમેઝોનના કર્મચારીઓ જ ચોરીમાં સંડોવાયેલા

પોલીસના જણાવ્યા અનુસાર, 789 સેલમ રોડ પર આવેલા એમેઝોન ફુલફિલમેન્ટ સેન્ટરમાં કામ કરતા બે કર્મચારીઓ સામે નવેમ્બર મહિનામાં તપાસ શરૂ કરવામાં આવી હતી. આ બંને કર્મચારીઓ છેલ્લા બે વર્ષથી ચોરી કરતા હોવાનું આરોપ છે.

એમેઝોનની Loss Prevention Team (ચોરી અટકાવતી ટીમ) દ્વારા શંકાસ્પદ ગતિવિધિઓ અંગે પોલીસને માહિતી આપવામાં આવી હતી, ત્યારબાદ સંયુક્ત તપાસ શરૂ કરવામાં આવી.

કર્મચારીઓ છેલ્લા 2 વર્ષથી ચોરી કરતા હોવાનો આરોપ

તપાસકર્તાઓનું કહેવું છે કે એમેઝોનની ‘લોસ પ્રિવેન્શન ટીમ’ (ચોરી અટકાવતી ટીમ) એ તેમનો સંપર્ક કર્યો હતો. એવો આરોપ હતો કે આ કર્મચારીઓ છેલ્લા બે વર્ષથી થઈ રહેલી આ ચોરી માટે જવાબદાર હતા.

સંયુક્ત તપાસ બાદ, ડરહામ પોલીસે બંને કર્મચારીઓની અટકાયત કરી હતી અને ત્યારબાદ સ્કારબોરો (Scarborough)માં આવેલા એક ઘરની ઝડતી લેવા માટે સર્ચ વોરંટનો અમલ કર્યો હતો. પોલીસના જણાવ્યા મુજબ, તેના પરિણામે વધુ ત્રણ શંકાસ્પદ આરોપીઓની ધરપકડ કરવામાં આવી હતી.

અત્યાધુનિક ઈલેક્ટ્રોનિક્સ સાધનો-રોકડ જપ્ત

પોલીસે જણાવ્યું હતું કે તેમણે કુલ મળીને $250,000 થી વધુની કિંમતના અત્યાધુનિક ઈલેક્ટ્રોનિક્સ સાધનો અને $50,000 રોકડા જપ્ત કર્યા છે.

ધરપકડ કરાયેલા પાંચ લોકોમાં સ્કારબોરોના ચાર અને ન્યૂમાર્કેટના એક વ્યક્તિનો સમાવેશ થાય છે, જેમની ઉંમર 28 થી 36 વર્ષની વચ્ચે છે, તેઓના નામ જાન્વીબેન ધામેલિયા, યશ ધામેલિયા, મેહુલ બલદેવભાઈ પટેલ, આશિષકુમાર સવાણી અને બંસરી સવાણી જાહેર થયા છે. આ તમામ સામે ટ્રાફિકિંગના હેતુથી ગુનાહિત રીતે મેળવેલી મિલકત રાખવાનો આરોપ મૂકવામાં આવ્યો છે.

આ ઉપરાંત, મેહુલ પટેલ અને આશિષકુમાર સવાણી સામે છેતરપિંડી અને ચોરીના વધારાના આરોપો પણ મૂકવામાં આવ્યા છે.