સીબીઆઇ (સેન્ટ્રલ બ્યુરો ઑફ ઇન્વેસ્ટિગેશન)એ આજે 34 હજાર કરોડ રૂપિયાના બેંક કૌભાંડ કેસમાં દરોડા દરમિયાન 40 કરોડ રૂપિયાના ચિત્રો અને શિલ્પો જપ્ત કર્યા છે. આરોપ છે કે આ પેઇન્ટિંગ શિલ્પો માત્ર બેંક કૌભાંડના પૈસાથી ખરીદવામાં આવ્યા હતા. સીબીઆઈએ જૂન 2022માં કેસ નોંધ્યા બાદ દરોડા પાડ્યા હતા. આ કેસમાં સામેલ એક આરોપીનું કનેક્શન અંડરવર્લ્ડ ડોન છોટા શકીલના લોકો સાથે પણ જોડાયેલુ હોવાની શક્યતા છે.
સીબીઆઈના એક અધિકારીએ જણાવ્યું કે રેબિકા દીવાન અને અજય રમેશ નાવંદરના સ્થળો પર દરોડા પાડવામાં આવ્યા હતા. સીબીઆઈને માહિતી મળી હતી કે બેંક કૌભાંડના પૈસા આરોપીઓએ અન્ય લોકોને પણ આપ્યા છે જેથી તેઓ પૈસા અહીં-ત્યાં મોકલી શકે. તપાસના આ પ્રકરણમાં બંનેના નામ સામે આવ્યા હતા.
જેમાં રેબિકા આ કેસના મુખ્ય આરોપી કપિલ વાધવનની ખાસ વ્યક્તિ હોવાનું કહેવાય છે. માહિતીના આધારે સીબીઆઈએ આજે મહાબળેશ્વર અને મુંબઈમાં તેમના સ્થાનો પર દરોડા પાડ્યા હતા. આ દરોડા દરમિયાન અનેક અમૂલ્ય ચિત્રો અને શિલ્પો મળી આવ્યા હતા. આ સિવાય અનેક ગુનાહિત દસ્તાવેજો અને ઈલેક્ટ્રોનિક ઉપકરણો પણ મળી આવ્યા હતા.
સીબીઆઈના એક અધિકારીએ કહ્યું કે આ પેઈન્ટિંગ્સમાં એક પેઈન્ટરનું પેઈન્ટિંગ છે, જે ખૂબ જ મોંઘુ કહેવાય છે. પ્રાથમિક અંદાજ મુજબ, આ એક પેઇન્ટિંગની કિંમત 25 કરોડ રૂપિયાથી વધુ હોવાનું કહેવાય છે. સીબીઆઈને પ્રાથમિક તપાસ દરમિયાન જાણવા મળ્યું છે કે, આજે દરોડા પાડવામાં આવેલા બે લોકોને કૌભાંડના પૈસા આરોપીઓએ મોકલ્યા હતા. ચિત્રો અને શિલ્પોની વાસ્તવિક કિંમત ટૂંક સમયમાં આંકવામાં આવશે.
સીબીઆઈના સૂત્રોના જણાવ્યા અનુસાર આ કેસમાં અત્યાર સુધી જે લોકો પર દરોડા પાડવામાં આવ્યા છે તેમાંથી એકનું અંડરવર્લ્ડ કનેક્શન હોવાનું પણ કહેવાય છે. સૂત્રોનું કહેવું છે કે આ કેસમાં અત્યાર સુધીમાં લગભગ દોઢ ડઝન સ્થળોએ દરોડા પાડવામાં આવ્યા છે અને સીબીઆઈને પ્રાથમિક તપાસ દરમિયાન જાણવા મળ્યું છે કે તેમાંથી એક કુખ્યાત અંડરવર્લ્ડ ડોન છોટા શકીલ સાથે પણ સંબંધિત છે.
નોંધનીય છે કે અત્યાર સુધી આ કેસનું સીધુ કનેક્શન અંડરવર્લ્ડ સાથે જોડાયેલુ નથી, પરંતુ આ કેસમાં સામેલ કથિત આરોપીઓ અંડરવર્લ્ડ સાથે સંબંધિત હોવાનું કહેવાય છે, જેની તપાસ ચાલી રહી છે. ઉલ્લેખનીય છે કે સીબીઆઈએ 22 જૂન 2022 ના રોજ 17 બેંકોના જૂથને 34,000 કરોડ રૂપિયાની છેતરપિંડી કરવા બદલ FIR નોંધી હતી અને તે જ દિવસે 12 સ્થળોએ દરોડા પાડ્યા હતા. આ કેસમાં આરોપ છે કે આરોપીઓએ બેંકમાંથી લીધેલા પૈસાનો ઉપયોગ પોતાના અંગત કામોમાં કર્યો, જેના કારણે બેંકોને નુકસાન થયું.
