દેશમાં ફરી એકવાર કોરોના ના નવા વેરિએન્ટના કેસ મળી આવતા સરકાર એલર્ટ જોવા મળી રહી છે, સરકારે રાજ્યોને એલર્ટ રહેવા તાકીદ કરી છે, અને એડવાઇઝરી પણ જાહેર કરી છે. નીતિ આયોગના સભ્ય અને નિષ્ણાત ડૉ. વી.કે. પોલે બુધવારે જણાવ્યું હતું કે અત્યાર સુધીમાં સમગ્ર દેશમાં કોવિડ-19 સબ-વેરિઅન્ટ JN.1 ના 21 નવા કેસ નોંધાયા છે, પરંતુ ગભરાવાની જરૂર નથી. પૌલે કહ્યું કે ભારતમાં વૈજ્ઞાનિક સમુદાય નવા પ્રકારની નજીકથી તપાસ કરી રહ્યો છે. આ સાથે તેમણે રાજ્યોને પરીક્ષણ વધારવા અને તેમની સર્વેલન્સ સિસ્ટમને મજબૂત કરવાની જરૂરિયાત પર ભાર મૂક્યો. પૌલે કહ્યું કે ચેપથી સંક્રમિત લગભગ 91 થી 92 ટકા લોકો ઘરે સારવાર પસંદ કરી રહ્યા છે.
સત્તાવાર સૂત્રોના જણાવ્યા અનુસાર કોરોના ના સબ-ફોર્મ JN.1 ના નવા કેસોમાંથી, ગોવામાં 19 કેસ નોંધાયા હતા જ્યારે કેરળ અને મહારાષ્ટ્રમાં એક-એક કેસ નોંધાયો હતો. છેલ્લા બે સપ્તાહમાં કોવિડ-19થી સંબંધિત 16 દર્દીઓના મોત થયા છે. કેન્દ્ર સરકારે રાજ્યો અને કેન્દ્રશાસિત પ્રદેશોને દેશમાં કોવિડ-19 કેસમાં થયેલા વધારા અને નવા JN.1 વેરિઅન્ટના ઉદભવ વચ્ચે દેખરેખ રાખવા જણાવ્યું છે. કેન્દ્રીય આરોગ્ય પ્રધાન મનસુખ માંડવિયાએ બુધવારે દેશભરમાં આરોગ્ય સુવિધાઓની તૈયારીઓની સમીક્ષા કરી અને કોરોના વાયરસના ઉભરતા પ્રકારો પ્રત્યે સતર્ક રહેવા પર ભાર મૂક્યો. કેન્દ્રીય આરોગ્ય સચિવ સુધાંશ પંતે કહ્યું કે કેસ વધી રહ્યા હોવા છતાં, 92.8 ટકા કેસની સારવાર ઘરે થઈ રહી છે, જે હળવી બીમારી સૂચવે છે.
તેમણે કહ્યું કોરોના ના કારણે હોસ્પિટલમાં દાખલ થવાના દરમાં કોઈ વધારો થયો નથી. જે દર્દીઓને હોસ્પિટલમાં દાખલ કરવામાં આવ્યા છે તેઓમાં સહ-રોગ હતો અને તેઓને અચાનક કોવિડ હોવાનું નિદાન થયું હતું.” દેશના કેટલાક રાજ્યો જેમ કે કેરળ, મહારાષ્ટ્ર, ઝારખંડ અને કર્ણાટકમાં દરરોજ ચેપ દરમાં વધારો જોવા મળ્યો છે. બુધવારે અપડેટ કરાયેલ કેન્દ્રીય આરોગ્ય મંત્રાલયના ડેટા અનુસાર ભારતમાં કોરોનાવાયરસ ચેપના 614 નવા કેસ નોંધાયા છે, જે 21 મે પછી એક જ દિવસમાં સૌથી વધુ છે. આ સાથે દેશમાં સારવાર હેઠળના કેસોની સંખ્યા વધીને 2,311 થઈ ગઈ છે.
આ પણ વાંચો:વડોદરામાં નકલી રોયલ્ટી પાસનો થયો પર્દાપાશ, સરકારી તિજોરીને 3 લાખ ઉપરાંતનું નુકશાન
આ પણ વાંચો:સીએમ ભુપેન્દ્ર પટેલે છઠ્ઠી સ્માર્ટ હેકાથોનને પ્રારંભ કરાવ્યો
