કોરોના સમયગાળા દરમિયાન બેરોજગારી દરમાં ઘટાડો થયો છે. સરકારી આંકડાઓ અનુસાર, 2020-21માં બેરોજગારીનો દર ઘટીને 4.2 ટકા પર આવી ગયો છે. કોરોનાના સમયગાળા દરમિયાન લાદવામાં આવેલા લોકડાઉનની ભારતના જોબ માર્કેટ પર બહુ અસર થઈ નથી. નોંધનીય છે કે વર્ષ 2019-20માં આ સમયગાળા દરમિયાન ભારતનો બેરોજગારી દર ઘટીને 4.8 ટકા થયો હતો જે આ વર્ષે ઘટીને 4.2 ટકા પર આવી ગયો છે.
સરકારે આંકડા કર્યા જાહેર
આ અંગેની માહિતી આંકડા અને કાર્યક્રમ અમલીકરણ મંત્રાલય દ્વારા જારી કરાયેલા આંકડા પરથી પ્રાપ્ત થઈ છે. નેશનલ સ્ટેટિસ્ટિકલ ઑફિસ (NSO) એ જણાવ્યું છે કે એક નિશ્ચિત સમયગાળા દરમિયાન યોજાનાર લેવરફોર્સ સર્વે (PLFS) અનુસાર, 2018-19માં બેરોજગારીનો દર 5.8 ટકા અને 2017-18માં 6.1 ટકા હતો.
બેરોજગારી દર 4 વર્ષથી નીચે આવી રહ્યો છે
ઉલ્લેખનીય છે કે છેલ્લા 4 વર્ષથી બેરોજગારી દરમાં સતત ઘટાડો થઈ રહ્યો છે. PLFSનો વાર્ષિક અહેવાલ (જુલાઈ, 2020 થી જૂન, 2021) જણાવે છે કે બેરોજગારી દર (UR) 2020-21માં 4.2 ટકા હતો, જે 2019-20માં 4.8 ટકા હતો.
ધીમી ગતિ
નોંધનીય છે કે કુલ કર્મચારીઓમાં બેરોજગાર વ્યક્તિઓની ટકાવારીને બેરોજગારી દર (UR) કહેવામાં આવે છે. ડેટા દર્શાવે છે કે છેલ્લા ચાર વર્ષ 2020-21 (જુલાઈથી જૂન) દરમિયાન બેરોજગારીનો દર ઘટ્યો છે. જોકે તેની ગતિ ધીમી રહી છે.
પુરુષો-મહિલાઓનો યુઆર દર
પુરૂષો માટે 2020-21 દરમિયાન યુઆર દર ઘટીને 4.5 ટકા પર આવી ગયો, જે 2019-20માં 5.1 ટકા, 2018-19માં 6 ટકા અને 2017-18માં 6.2 ટકા હતો. જયારે સ્ત્રીઓ માટે યુઆર દરમાં પણ સમાન વલણ જોવા મળ્યું છે. 2020-21 દરમિયાન મહિલાઓ માટે યુઆર રેટ ઘટીને 3.5 ટકા થયો છે. 2019-29માં તે 4.2 ટકા, 2018-19માં 5.2 ટકા અને 2017-18માં 5.7 ટકા હતો.
ડબ્લ્યુપીઆરમાં સુધારો
વર્કર પોપ્યુલેશન રેશિયો (WPR)માં પણ સુધારો થયો છે. તે વસ્તીમાં કામ કરતા લોકોની ટકાવારી દર્શાવે છે. રિપોર્ટ અનુસાર, WPR 2020-21માં વધીને 39.8 ટકા થયો, જે 2019-20માં 38.2 ટકા, 2018-19માં 35.3 ટકા અને 2017-18માં 34.7 ટકા હતો.
ગ્રામ્ય વિસ્તારની સ્થિતિ
આ ઉપરાંત, ગ્રામીણ અને શહેરી વિસ્તારો માટે જુલાઈ, 2020 થી જૂન, 2021 સુધીના વાર્ષિક અહેવાલમાં પ્રથમ તબક્કાના કુલ 12,562 એકમોનો સમાવેશ કરવામાં આવ્યો છે. તેમાં 6,930 ગામો અને 5,632 શહેરી બ્લોકનો સમાવેશ થાય છે.
