Gauchar Land Encroachment Gujarat: ગુજરાત વિધાનસભાના વર્તમાન સત્રમાં પશુપાલકો અને પશુધન માટે અત્યંત ચિંતાજનક સમાચાર સામે આવ્યા છે. રાજ્યમાં પશુઓના ચરિયાણ માટે અનામત રાખવામાં આવેલી પવિત્ર ગૌચર જમીનો પર ગેરકાયદેસર દબાણોનો પર્દાફાશ થયો છે. સરકારી આંકડા મુજબ, રાજ્યના 26 જિલ્લાઓમાં કુલ 7653 જેટલા દબાણો નોંધાયા છે, જેમાં પોરબંદર જિલ્લો સૌથી ખરાબ સ્થિતિમાં છે.
વિધાનસભામાં રજૂ થયેલા ચોંકાવનારા આંકડા
વિપક્ષ દ્વારા પૂછવામાં આવેલા લેખિત પ્રશ્નોના જવાબમાં રાજ્ય સરકારે સ્વીકાર્યું છે કે ગૌચરની હજારો એકર જમીન પર ભૂમાફિયાઓ અથવા સ્થાનિક તત્વોએ ગેરકાયદે કબ્જો જમાવ્યો છે. ગૌચર દબાણના મામલે ટોપ 3 જિલ્લાઓમાં પોરબંદર (1932), મહેસાણા (965) અને આણંદ (784) નો સમાવેશ થાય છે. સૌરાષ્ટ્રની સ્થિતિ પર નજર કરીએ તો જૂનાગઢમાં 636, ગીર સોમનાથમાં 589, રાજકોટમાં 511 અને અમરેલીમાં 232 દબાણો નોંધાયા છે. જ્યારે ઉત્તર અને મધ્ય ગુજરાતમાં બનાસકાંઠામાં 586, ગાંધીનગરમાં 369 અને અમદાવાદમાં 182 કિસ્સાઓ સામે આવ્યા છે. સમગ્ર રાજ્યમાં સૌથી ઓછા દબાણો પંચમહાલમાં માત્ર 3 અને સુરેન્દ્રનગરમાં 4 નોંધાયા હોવાનું સરકારે જણાવ્યું છે.
માલધારી સમુદાયમાં પણ રોષ
ગુજરાતનું ગ્રામીણ અર્થતંત્ર પશુપાલન પર નિર્ભર છે. ગૌચરની જમીન પર થતા બાંધકામો અથવા ગેરકાયદેસર ખેતીને કારણે પશુઓને ચરવા માટે જગ્યા બચી નથી. માલધારી સમુદાય લાંબા સમયથી આ જમીનો ખુલ્લી કરાવવાની માંગ કરી રહ્યો છે. આ દબાણો પશુધનના સંવર્ધન માટે મોટો પડકાર બની રહ્યા છે.
Gauchar Land : શું લેવાશે પગલાં?
રાજ્ય સરકારે ગૃહમાં ખાતરી આપતા જણાવ્યું છે કે ગૌચરના દબાણો દૂર કરવા માટે હવે વહીવટી તંત્ર પૂર્ણ રીતે સક્રિય થયું છે. આ દિશામાં કાર્યવાહીના ભાગરૂપે અનેક કિસ્સાઓમાં દબાણકર્તાઓને કાયદેસરની નોટિસો ફટકારવામાં આવી છે, જોકે કેટલાક કિસ્સાઓ હાલ ન્યાયાલયમાં હોવાને કારણે કાનૂની ગૂંચને લીધે આગળની કાર્યવાહી અટકી પડી છે. તેમ છતાં, સરકારે સ્થાનિક પંચાયતો અને મહેસૂલ વિભાગને પરસ્પર સંકલનમાં રહીને ખાસ ઝુંબેશ ચલાવવા માટે કડક સૂચનાઓ આપી છે, જેથી ગૌચરની જમીનોને વહેલી તકે દબાણમુક્ત કરી શકાય.
આ પણ વાંચો: વિધાનસભામાં પોલીસ ભરતી પર મોટો નિર્ણય! રાજ્યમાં ટૂંક સમયમાં 10 હજાર કોન્સ્ટેબલોની ભરતી કરાશે
આ પણ વાંચો: હર ઘર સ્વદેશી, ઘર ઘર સ્વદેશી, ગાંધીનગર વિધાનસભામાં ‘મહિલા આર્ટ એન્ડ ક્રાફ્ટ ફેસ્ટિવલ’ શરૂ
આ પણ વાંચો: આજથી લગ્ન નોંધણીના નવા નિયમો જાહેર થશે,વિધાનસભામાં ના. મુખ્યમંત્રી હર્ષ સંઘવી કરશે જાહેરાત
