ગધેડીના દૂધમાંથી ઘોડા જેવી કમાણી, પાટણના યુવકનો અનોખો બિઝનેશ

Patan News: અમૂલનું નામ આવતાની સાથે જ ગુજરાતનું ચિત્ર ઉભરી આવે છે. દેશમાં દૂધ ઉત્પાદનમાં ગુજરાત અગ્રેસર રાજ્ય છે, આ બધાની વચ્ચે ગુજરાતના પાટણ જિલ્લામાં એક યુવકે ગધેડાં ફાર્મ ખોલીને દૂધનો અનોખો વ્યવસાય શરૂ કર્યો છે. આ યુવક દર મહિને ઓનલાઈન દૂધ વેચીને બેથી ત્રણ લાખ રૂપિયા કમાઈ રહ્યો છે. આ યુવકે ફાર્મ હાઉસમાં 43 માદા ગધેડાઓ રાખી છે. તેમનું દૂધ 5000 રૂપિયા પ્રતિ લીટરના ભાવે વેચાઈ રહ્યું છે. ગધેડીના દૂધની કિંમત પરંપરાગત દૂધ કરતાં 70 ગણી વધારે છે.

20 ગધેડાંથી શરૂઆત કરી

ગુજરાતના પાટણમાં રહેતા ધીરેન સોલંકીએ તેના ગામમાં 42 ગધેડાં સાથે ગધેડાંનું ફાર્મ બનાવ્યું છે. તેઓ હવે દક્ષિણના રાજ્યોમાં ગધેડીના દૂધના ઓનલાઈન સપ્લાયને કારણે ચર્ચામાં આવ્યા છે. મીડિયા સાથે વાત કરતા સોલંકીએ કહ્યું કે હું સરકારી નોકરી શોધી રહ્યો હતો. મને અમુક નોકરીઓ મળી પણ આ નોકરીઓમાંથી મળેલા પગારથી મારા પરિવારનો ખર્ચ ઘણી મુશ્કેલથી પૂરો કરી શકતો. દરમિયાન, મને દક્ષિણ ભારતમાં ગધેડાં પાળવા વિશે જાણવા મળ્યું. હું કેટલાક લોકોને મળ્યો અને લગભગ 8 મહિના પહેલા મારા ગામમાં આ ફાર્મની સ્થાપના કરી. ધીરેનના કહેવા પ્રમાણે, તેણે 20 ગધેડાં અને 22 લાખ રૂપિયાના રોકાણથી શરૂઆત કરી. હવે તેની પાસે કુલ 42 ગધેડાં છે.

દક્ષિણમાં દૂધની માગ છે

ધીરેનના કહેવા પ્રમાણે, શરૂઆતમાં ઘણી સમસ્યાઓ હતી. પાંચ મહિના સુધી કંઈ કમાઈ ન શક્યો પણ જ્યારે મેં દક્ષિણ ભારતની કંપનીઓમાં દૂધ મોકલવાનું શરૂ કર્યું ત્યારે મારી આવક થવા લાગી. સોલંકીના જણાવ્યા મુજબ, ગધેડીના દૂધની માગ છે. ધીરેન હવે નિયમિતપણે કર્ણાટક અને કેરળમાં સપ્લાય કરે છે. તેમના ગ્રાહકોમાં કોસ્મેટિક કંપનીઓ પણ છે જેઓ તેમના ઉત્પાદનોમાં ગધેડીના દૂધનો ઉપયોગ કરે છે. ધીરેન સોલંકીના જણાવ્યા અનુસાર, ગાયનું દૂધ 65 રૂપિયા પ્રતિ લીટર સુધી વેચાય છે. ગધેડીના દૂધની કિંમત પાંચ હજારથી સાત હજાર રૂપિયા સુધીની છે.

ધીરેનના જણાવ્યા અનુસાર માદા ગધેડીમાંથી મેળવેલ દૂધ કાઢીને ફ્રીઝરમાં સંગ્રહિત કરવામાં આવે છે. ગધેડાંના દૂધને પણ સૂકવીને વેચવામાં આવે છે. એક કિલો પાઉડર દૂધની કિંમત 1 લાખ રૂપિયા સુધી હોઈ શકે છે. સોલંકીના ખેતરમાં હવે 42 ગધેડાં છે અને તેણે અત્યાર સુધીમાં લગભગ 38 લાખ રૂપિયાનું રોકાણ કર્યું છે. સોલંકીએ હજુ સુધી રાજ્ય સરકાર પાસેથી કોઈ મદદ લીધી નથી. પ્રાચીન કાળ વિશે એવું કહેવાય છે કે ઇજિપ્તની રાણી ક્લિયોપેટ્રા તેની સાથે સ્નાન કરતી હતી. ગધેડીના દૂધનો ઉપયોગ દવાઓમાં થતો હતો.