ભારતને ભવિષ્યલક્ષી કુશળ કાર્યબળથી સજ્જ બનાવવાના હેતુથી ઇન્ડિયાસ્કિલ્સ પશ્વિમ ક્ષેત્રીય સ્પર્ધા 2025-26ની ભવ્ય શરૂઆત ગાંધીનગરમાં થઈ છે. ગુજરાત નેશનલ લૉ યુનિવર્સિટી ખાતે આયોજિત આ સ્પર્ધાનું ઉદ્ઘાટન ભારત સરકારના કૌશલ્ય વિકાસ અને ઉદ્યોગસાહસિકતા મંત્રાલયના રાજ્યમંત્રી (સ્વતંત્ર હવાલો) તથા શિક્ષણ રાજ્યમંત્રી જયંત ચૌધરીએ કર્યું હતું.
કૌશલ્ય વિકાસ અને ઉદ્યોગસાહસિકતા મંત્રાલય (MSDE) દ્વારા આયોજિત અને રાષ્ટ્રીય કૌશલ્ય વિકાસ નિગમ (NSDC) દ્વારા અમલમાં મુકાયેલી આ ચાર દિવસીય સ્પર્ધામાં ગુજરાત, મહારાષ્ટ્ર, રાજસ્થાન, ગોવા અને મધ્યપ્રદેશના 200થી વધુ પ્રતિભાશાળી યુવાનો 63 કૌશલ્ય શ્રેણીઓમાં સ્પર્ધા કરી રહ્યા છે.
ઉદ્ઘાટન સમારોહમાં જયંત ચૌધરીએ જણાવ્યું હતું કે ઇન્ડિયાસ્કિલ્સ માત્ર એક સ્પર્ધા નથી, પરંતુ ભારતના કુશળ કાર્યબળના નિર્માણ માટેનું મહત્વપૂર્ણ પ્લેટફોર્મ છે. તેમણે કહ્યું કે આ ઇવેન્ટ પશ્ચિમ ક્ષેત્રના યુવાનોની ટેકનિકલ કુશળતા, શિસ્ત અને મહત્વાકાંક્ષા દર્શાવે છે અને દેશના કૌશલ્ય વિકાસ માળખામાં ક્ષેત્રીય પ્રણાલીઓની ભૂમિકા દર્શાવે છે.
તેમણે ઉમેર્યું હતું કે ઇન્ડિયાસ્કિલ્સ દ્વારા યુવાનોને સ્થાનિક તાલીમથી લઈને રાષ્ટ્રીય અને આંતરરાષ્ટ્રીય સ્તર સુધી પહોંચવાનો સ્પષ્ટ માર્ગ મળે છે, જે રાષ્ટ્રીય શિક્ષણ નીતિ 2020ના વિઝન સાથે સુસંગત છે.
પશ્ચિમ ક્ષેત્રના ઔદ્યોગિક મહત્વ પર ભાર મૂકતાં શ્રી ચૌધરીએ કહ્યું કે ગુજરાત, મહારાષ્ટ્ર અને રાજસ્થાન જેવા રાજ્યો ઉત્પાદન, નવીનીકરણીય ઊર્જા, ઓટોમોબાઇલ્સ, કાપડ, રત્ન-ઝવેરાત અને લોજિસ્ટિક્સ જેવા ક્ષેત્રોમાં આગેવાન છે. ગુજરાતે ઉદ્યોગોની જરૂરિયાતો સાથે કૌશલ્ય વિકાસને જોડીને ઉત્તમ ઉદાહરણ રજૂ કર્યું છે, જે આર્થિક વિકાસને વેગ આપે છે.
તેમણે ટેક્નોલોજી અને ખાસ કરીને આર્ટિફિશિયલ ઇન્ટેલિજન્સ (AI)થી કાર્યપ્રણાલીમાં આવી રહેલા ફેરફારોની ચર્ચા કરતાં જણાવ્યું હતું કે સરકાર રિસ્કિલિંગ અને અપસ્કિલિંગ પર વિશેષ ધ્યાન આપી રહી છે. SOAR (સ્કિલિંગ ફોર AI રેડીનેસ) જેવી પહેલ દ્વારા યુવાનોને AI માટે તૈયાર કરવામાં આવી રહ્યા છે.
ઇન્ડિયાસ્કિલ્સ સ્પર્ધાને તેમણે “લૉન્ચપેડ” ગણાવતા સહભાગીઓને સતત શીખતા રહેવા અને શ્રેષ્ઠતા માટે પ્રયત્નશીલ રહેવા પ્રોત્સાહિત કર્યા.
આ કાર્યક્રમમાં મહારાષ્ટ્ર સરકારના મંત્રી મંગલ પ્રભાત લોઢા, ગુજરાત સરકારના મંત્રી કુંવરજીભાઈ બાવળીયા સહિત અનેક વરિષ્ઠ અધિકારીઓ અને મહાનુભાવો હાજર રહ્યા હતા.
ગાંધીનગરમાં શરૂ થયેલી પશ્ચિમ ક્ષેત્રીય સ્પર્ધામાં 63 કૌશલ્ય શ્રેણીઓમાંથી 41 કૌશલ્યોનું સ્થળ પર લાઇવ પ્રદર્શન અને 22 કૌશલ્યોનું ઓફસાઇટ મૂલ્યાંકન કરવામાં આવશે. આ સ્પર્ધા 18 ફેબ્રુઆરી સુધી ચાલશે, જેમાંથી ઉત્કૃષ્ટ સ્પર્ધકો રાષ્ટ્રીય ઇન્ડિયાસ્કિલ્સ અને ત્યારબાદ વર્લ્ડસ્કિલ્સ જેવી આંતરરાષ્ટ્રીય સ્પર્ધાઓમાં ભારતનું પ્રતિનિધિત્વ કરશે.
ઇન્ડિયાસ્કિલ્સ પહેલ વૈશ્વિક ધોરણો મુજબ ભવિષ્ય માટે સજ્જ કાર્યબળ તૈયાર કરવા માટે ભારતના મિશનને વધુ મજબૂત બનાવી રહી છે અને યુવાનો માટે નવી તકોના દ્વાર ખોલી રહી છે.
આ પણ વાંચો:
આ પણ વાંચો:
આ પણ વાંચો:
