- નેપાળમાં વરસાદના લીધે અત્યાર સુધીમાં 110ના મોત
- સંયુક્ત રાષ્ટ્રસંઘની એજન્સીઓ દ્વારા હાથ ધરવામાં આવ્યું રાહત કાર્ય
- ભારે વરસાદ અને ખરાબ રસ્તાના લીધે બચાવકાર્યમાં નડતો અવરોધ
નેપાળમાં વરસાદે વિકરાળ સ્વરૂપ ધારણ કર્યું છે. મૂશળધાર વરસાદને કારણે પૂરની સ્થિતિ સર્જાઈ છે. ઘણી જગ્યાએ ભૂસ્ખલન થઈ રહ્યું છે. છેલ્લા એક સપ્તાહમાં ઓછામાં ઓછા 33 લોકોના મોત થયા છે. કરનાલી પ્રાંતમાં વરસાદે તબાહી મચાવી છે. અધિકારીઓના જણાવ્યા અનુસાર હજારો લોકોને અહીંથી સુરક્ષિત સ્થળે ખસેડવામાં આવ્યા છે. સેંકડો મકાનો ધરાશાયી થયા છે.
સ્થાનિક મીડિયા અનુસાર, એક જ પ્રાંતમાંથી ઓછામાં ઓછા 22 લોકો ગુમ છે અને હજારો ઘાયલ થયા છે. અવિરત વરસાદને કારણે મુશ્કેલ પહાડી માર્ગોમાં રાહત કાર્ય હાથ ધરવું મુશ્કેલ બન્યું છે. ઘણા પ્રાંતોમાં હેલિકોપ્ટર દ્વારા લોકોને બચાવવાના પ્રયાસો કરવામાં આવી રહ્યા હતા, પરંતુ ખરાબ હવામાનને કારણે તે શક્ય નથી. અધિકારીઓનું કહેવું છે કે દુર્ભાગ્યવશ હવામાન યોગ્ય નથી અને તેના કારણે બચાવ કાર્ય પ્રભાવિત થઈ રહ્યું છે.
કાલીકોટ જિલ્લામાંથી અનેક લોકો ગુમ થયાની ફરિયાદો ઉઠી છે. છેલ્લા એક સપ્તાહમાં વરસાદની ચેતવણીને કારણે હજારો લોકોને તેમના ઘર છોડીને સુરક્ષિત સ્થળે ખસી જવા માટે કહેવામાં આવ્યું છે. નેપાળના ઈમરજન્સી એડમિનિસ્ટ્રેશન અનુસાર, પ્રાંતના ઘણા વિસ્તારોમાં કરનાલી નદીનું જળસ્તર વધીને 39 ફૂટ થઈ ગયું છે. નદી પરના અનેક પુલ ધોવાઈ ગયા છે. સરકાર હેલિકોપ્ટર દ્વારા લોકો સુધી રાહત સામગ્રી પહોંચાડવાનો પ્રયાસ કરી રહી છે. દરમિયાન, સંયુક્ત રાષ્ટ્રની એજન્સી પણ દવાઓ અને ખોરાક પહોંચાડવાનો પ્રયાસ કરી રહી છે.
નેપાળમાં આ સમયે ચોમાસું સમાપ્ત થવાના આરે છે. સામાન્ય રીતે અહીં ચોમાસું જૂનથી શરૂ થાય છે અને ઓક્ટોબરના અંત સુધી ચાલે છે. આ વર્ષે અત્યાર સુધીમાં 110 લોકો વરસાદને કારણે ફેલાતી બીમારીઓને કારણે મૃત્યુ પામ્યા છે.
