Gujarat News:દિલ્હીના જંતર-મંતર ખાતે ચાલી રહેલા સોનમ વાંગચુકના સમર્થનના આંદોલનની અસર હવે ગુજરાત સુધી પહોંચી છે. રાજ્યના અનેક શહેરોમાં વિદ્યાર્થીઓ, યુવાનો, સામાજિક સંગઠનો અને રાજકીય કાર્યકરો રસ્તા પર ઉતરી વિરોધ નોંધાવી રહ્યા છે. અમદાવાદમાં પોલીસ અને પ્રદર્શનકારીઓ વચ્ચે ઘર્ષણ જેવી સ્થિતિ સર્જાઈ હતી, જ્યારે સુરત, જૂનાગઢ અને ભાવનગરમાં પણ મોટી સંખ્યામાં લોકોએ સરકાર સામે સૂત્રોચ્ચાર કરી વિરોધ નોંધાવ્યો.
Sonam Wangchuk Protestના પડઘા ગુજરાતમાં
દિલ્હીના જંતર-મંતર ખાતે છેલ્લા ઘણા સમયથી વિવિધ મુદ્દાઓને લઈને વિરોધ પ્રદર્શન ચાલી રહ્યા છે. આ દરમિયાન સોનમ વાંગચુક ઉપવાસ પર બેઠા હતા. તેમની તબિયત લથડતા તેમને હોસ્પિટલમાં ખસેડવામાં આવ્યા હતા. દિલ્હીમાં લાંબા સમયથી ચાલી રહેલા આંદોલનને વ્યાપક સમર્થન મળતાં હવે તેની અસર ગુજરાત (Gujarat Protest)માં પણ જોવા મળી રહી છે. રાજ્યના વિવિધ શહેરોમાં લોકો વિરોધ પ્રદર્શન કરીને પોતાની માંગણીઓ સરકાર સમક્ષ રજૂ કરી રહ્યા છે.
અમદાવાદમાં વિરોધ દરમિયાન પોલીસ અને પ્રદર્શનકારીઓ વચ્ચે તંગદિલી
અમદાવાદમાં 20 જુલાઈના રોજ યોજાયેલા વિરોધ પ્રદર્શન (Ahmedabad Protest)દરમિયાન પોલીસ અને પ્રદર્શનકારીઓ વચ્ચે તંગદિલી જોવા મળી હતી. વિરોધ કરી રહેલા લોકોને સ્થળ પરથી હટાવવા માટે પોલીસ લાકડીઓ લઈને તેમની પાછળ દોડી હતી. કેટલાક પ્રદર્શનકારીઓએ પોલીસ કાર્યવાહી સામે વિરોધ નોંધાવ્યો હતો. વિરોધમાં સામેલ મહિલાઓને પણ પોલીસે અટકાવી તેમની ટીંગાટોળી કરીને અટકાયત કરી હતી. ઘટનાના વીડિયો અને તસવીરો સોશિયલ મીડિયા પર વાયરલ થતાં સમગ્ર ઘટનાની ચર્ચા શરૂ થઈ છે.
સુરતમાં ‘ઇન્કલાબ જિંદાબાદ’ના નારાઓ સાથે વિરોધ
સુરત કલેક્ટર કચેરી ખાતે મોટી સંખ્યામાં વિદ્યાર્થીઓ, શિક્ષકો અને યુવાનો એકત્ર થયા હતા. પ્રદર્શનકારીઓ (Surat Protest)એ હાથમાં સોનમ વાંગચુકના ફોટા અને વિવિધ માંગણીઓ દર્શાવતા પોસ્ટરો લઈને સરકાર સામે સૂત્રોચ્ચાર કર્યો. ‘ઇન્કલાબ જિંદાબાદ’ના નારાઓ સાથે વિરોધીઓએ પોતાની નારાજગી વ્યક્ત કરી હતી. પ્રદર્શન દરમિયાન કેન્દ્રીય શિક્ષણમંત્રી ધર્મેન્દ્ર પ્રધાનના રાજીનામાની માંગ કરવામાં આવી હતી તેમજ સમગ્ર ઘટનાની નિષ્પક્ષ તપાસ કરવાની પણ અપીલ કરવામાં આવી હતી. આ વિરોધમાં સ્થાનિક કાર્યકર પરેશભાઈ મહાલેએ ભારતીય સંવિધાન હાથમાં લઈને અને અનોખું ટી-શર્ટ પહેરી વિરોધ નોંધાવ્યો હતો, જેના કારણે લોકોનું વિશેષ ધ્યાન આકર્ષાયું હતું.
જૂનાગઢ અને ભાવનગરમાં પણ વિરોધ પ્રદર્શન
જૂનાગઢમાં યુવાનો કલેક્ટર કચેરી બહાર એકત્ર થઈ વિરોધ પ્રદર્શન કર્યું હતું. પ્રદર્શનકારીઓએ વિવિધ સૂત્રોચ્ચાર કરીને સરકાર સામે પોતાની નારાજગી વ્યક્ત કરી હતી. તો ભાવનગરમાં પણ કોંગ્રેસના નગરસેવક કિશન મેર અને તેમના સમર્થકો ઘોઘા ગેટ ચોક સહિતના મુખ્ય બજાર વિસ્તારમાં હાથમાં પોસ્ટરો લઈને રસ્તા પર ઉતર્યા હતા. શહેરમાં શાંતિપૂર્ણ રીતે વિરોધ નોંધાવવામાં આવ્યો હતો, જોકે સમગ્ર ઘટનાએ સ્થાનિક રાજકારણમાં પણ ચર્ચા જગાવી છે.
આ પણ વાંચો: સોનમ વાંગચુક કાલે સમાપ્ત કરી શકે છે ભૂખ હડતાળ, પત્નીએ મૂકી મહત્વની શરત
આ પણ વાંચો: સોનમ વાંગચુકને દિલ્હી હાઈકોર્ટથી વચગાળાની રાહત નહીં
આ પણ વાંચો: સોનમ વાંગચુકે હોસ્પિટલ પાસે રજા માગી, ‘મારે સંસદ માર્ચમાં જવું છે’
