વિશાખાપટ્ટનમ,
ભારત અને વેસ્ટ ઇન્ડીઝ વચ્ચે રમાઈ રહેલી પાંચ વન-ડે મેચની શ્રેણીની બીજી વન-ડે બુધવારે વિશાખાપટ્ટનમ ખાતે રમાશે. ગુહાવટી ખાતે રમાયેલી પ્રથમ મેચમાં શાનદાર વિજય મેળવી ચુકેલી ભારતીય ટીમ હાલ પોતાના શ્રેષ્ઠ ફોર્મમાંથી પસાર થઇ રહી છે, ત્યારે આ વન-ડે મેચમાં પણ વિરાટ બ્રિગેડ પોતાનો વિજયરથ રાખવા માટે મેદાને ઉતરશે.
બીજી બાજુ કેરેબિયન ટીમે પ્રથમ વન-ડે મેચમાં ૫૦ ઓવરમાં ૩૨૨ રનનો વિશાળ સ્કોર ખડકયો હતો, પરંતુ ત્યારબાદ પણ તેઓને હારનો સ્વાદ ચાખવો પડ્યો હતો. ત્યારે હવે વેસ્ટ ઇન્ડીઝની ટીમ બીજી વન-ડેમાં પલટવાર કરવાનો કોશિશ કરશે અને શ્રેણી ૧-૧થી સરભર કરવાનો પ્રયાસ કરશે.
વિરાટ કોહલી બનાવી શકે છે સૌથી ઝડપી ૧૦,૦૦૦ રન
ભારતીય ટીમના કેપ્ટન વિરાટ કોહલીએ પ્રથમ વન-ડે મેચમાં શાનદાર સદી ફટકારવાની સાથે જ ૧૪૦ રન બનાવ્યા હતા અને ભારતને એકતરફી જીત અપાવવામાં મહત્વનો ફાળો ભજવ્યો હતો. બીજી વન-ડે મેચમાં કોહલી પોતાના ૧૦,૦૦૦ રન પુરા કરવાથી માત્ર ૮૧ રન દૂર છે.
જો કોહલી આ મેચમાં ૮૧ રન પુરા કરે છે તો તે સૌથી ઝડપી ૧૦,૦૦૦ રન બનાવવાનો રેકોર્ડ પોતાના નામે કરશે અને સચિન તેંડુલકરને પાછળ છોડી દેશે.
સચિન તેંડુલકરે આ પહેલા ૨૫૯ ઇનિંગ્સમાં ૧૦,૦૦૦ રન પૂર્ણ કર્યા હતા, જયારે વિરાટ કોહલીએ માત્ર ૨૦૪ ઇનિંગ્સમાં જ ૯૯૧૯ રન બનાવી ચુક્યો છે, ત્યારે આ મામલે તે માસ્ટર બ્લાસ્ટર સચિન તેંડુલકરને પાછળ છોડી શકે છે.