લંડન,
ઈંગ્લેંડમાં રમાયેલા વિમ્બલ્ડન ટેનિસ ટુર્નામેન્ટની ફાઈનલ જીતીને નોવાક જોકોવિચે ૧૩માં ગ્રેન્ડ સ્લેમ ખિતાબ પોતાના નામે કર્યો છે. રવિવારે રમાયેલી ફાઈનલ મેચમાં સ્ટાર ખેલાડી જોકોવિચે સાઉથ આફ્રિકાના વર્લ્ડ નંબર- ૮ ખેલાડી કેવિન એન્ડરસનને હરાવી રોમાંચક વિજય મેળવ્યો હતો.
૩૧ વર્ષીય નોવાક જોકોવિચે ૨ કલાક અને ૧૮ મિનિટ સુધી ચાલેલી ફાઈનલ મેચમાં એન્ડરસનને સીધા સેટોમાં ૬-૨, ૬-૨, ૭-૬ (૭-૩)થી હરાવ્યો હતો. આ સાથે ટેનિસ રેન્કિંગમાં ૧૨માં ક્રમાંકિત જોકોવિચે ચોથો વિમ્બલ્ડન ખિતાબ પોતાના નામે કર્યો છે. આ પહેલા ૨૦૧૬માં સર્બિયાના સ્ટાર ખેલાડીએ ફ્રેંચ ઓપનનું ટાઈટલ જીત્યું હતું.
આ પહેલા નોવાક જોકોવિચે વિમ્બલ્ડનના ઇતિહાસના બીજા સૌથી લાંબા સેમિફાઈનલ મુકાબલામાં સ્ટાર ખેલાડી રાફેલ નડાલને ૬-૪, ૩-૬, ૭-૬, ૩-૬, ૧૦-૮થી હરાવી ફાઈનલમાં એન્ટ્રી મારી હતી. આ મુકાબલો ૫ કલાક અને ૧૫ મિનિટ સુધી ચાલ્યો હતો.
જયારે સાઉથ આફ્રિકાના વર્લ્ડ નંબર ૮ ખેલાડી કેવિન એન્ડરસને વિમ્બલ્ડનના ઇતિહાસના સૌથી લાંબા સેમિફાઈનલ (૬ કલાક ૩૬ મિનિટ) મેચમાં જોન ઇસનેરને ૭-૬(૬), ૬-૭(૫), ૬-૭(૯), ૬-૪, ૨૬-૨૪થી હરાવ્યો હતો.
સર્બિયાના સ્ટાર ખેલાડી નોવાક જોકોવિચ ૧૩ ગ્રેન્ડ સ્લેમ જીતવાની સાથે જ રોજર ફેડરર (૨૦), રાફેલ નડાલ (૧૭), પીટ સૈમ્પ્રસ (૧૪) બાદ દુનિયામાં ચોથા સૌથી વધુ ગ્રેન્ડ સ્લેમ ખિતાબ જીતનાર ખેલાડી છે.
નોવાક જોકોવિચના સિંગલ્સ ગ્રેન્ડ સ્લેમ ટાઈટલ :
૧. ઓસ્ટ્રેલિયન ઓપન : ૬ ( ૨૦૦૮, ૨૦૧૧, ૨૦૧૨, ૨૦૧૩, ૨૦૧૫, ૨૦૧૬)
૨. ફ્રેંચ ઓપન : ૧ (૨૦૧૬)
૩. વિમ્બલ્ડન : ૪ ( ૨૦૧૧, ૨૦૧૪, ૨૦૧૫, ૨૦૧૮)
૪. યુએસ ઓપન : ૨ ( ૨૦૧૧, ૨૦૧૫)