નવી દિલ્હીઃ ભારતીય સેનાએ પ્રથમ વખત વિશ્વના સૌથી ઊંચા અને સૌથી ઠંડા સ્થળ સિયાચીનમાં મહિલા ડોક્ટરની નિમણૂક કરી છે. કેપ્ટન ગીતિકા કૌલને સિયાચીનમાં નીમવામાં આવ્યા છે, જે અહીં પોસ્ટ થનારી પ્રથમ મહિલા મેડિકલ ઓફિસર બની છે. ‘ફાયર એન્ડ ફ્યુરી’ કોર્પ્સે આ માહિતી આપી છે.
કેપ્ટન ગીતિકા કૌલે પ્રતિષ્ઠિત સિયાચીન બેટલ સ્કૂલમાં સખત તાલીમ સફળતાપૂર્વક પૂર્ણ કર્યા બાદ આ સિદ્ધિ મેળવી છે. આ સમય દરમિયાન તેમને ઊંચાઈ પર રહેવાની તાલીમ આપવામાં આવી છે. આ સિવાય તાલીમમાં સ્વ-રક્ષણ તકનીકો અને વિશેષ તબીબી પ્રક્રિયાઓનો સમાવેશ થાય છે.
ભારતીય સેનાના ‘ફાયર એન્ડ ફ્યુરી’ કોર્પ્સે કહ્યું, ‘સ્નો લેપર્ડ બ્રિગેડની કેપ્ટન ગીતિકા કૌલ સિયાચીન બેટલ સ્કૂલમાં સફળતાપૂર્વક તાલીમ પૂર્ણ કર્યા બાદ વિશ્વના સૌથી ઊંચા યુદ્ધક્ષેત્ર સિયાચીનમાં તૈનાત થનારી ભારતીય સેનાની પ્રથમ મહિલા મેડિકલ ઓફિસર બની છે.
કેપ્ટન ગીતિકા કૌલે આ સિદ્ધિ પર ખુશી વ્યક્ત કરી છે અને ભારતીય સેનાનો આભાર પણ વ્યક્ત કર્યો છે. તેમણે કહ્યું કે દેશની સેવા કરવા માટે પસંદગી પામવી એ ગર્વની વાત છે. હું દેશ માટે મારી દરેક ફરજ નિભાવીશ અને જીવ જોખમમાં મૂકીને પણ તેની રક્ષા કરીશ. સિયાચીન એ વિશ્વનું સૌથી ઊંચું યુદ્ધક્ષેત્ર છે, જે તેના વ્યૂહાત્મક મહત્વ તેમજ પ્રતિકૂળ આબોહવા અને પડકારજનક સ્થળ તરીકે જાણીતું છે.
આ પણ વાંચોઃ
આ પણ વાંચોઃ
આ પણ વાંચોઃ