Visakhapatnam News:આંધ્રપ્રદેશના વિશાખાપટ્ટનમમાં 6 વર્ષના બાળકના મોતની ઘટનાએ ચકચાર મચાવી છે. વન ટાઉન વિસ્તારમાં આવેલી લિટલ ગાર્ડન્સ સ્કૂલ (Visakhapatnam School Case)માં UKGમાં અભ્યાસ કરતા પ્રણય તેજાના મોતને લઈને તેના પરિવારજનોએ ગંભીર આક્ષેપો કર્યા છે. પરિવારનો દાવો છે કે હોમવર્ક ન કરવા બદલ શિક્ષકે બાળક સાથે મારપીટ કરી હતી. આ ઘટનાના CCTV ફૂટેજ સામે આવ્યા બાદ મામલો ચર્ચામાં આવ્યો છે.
બાળકને શાળા (Visakhapatnam School Case)માંથી સારવાર માટે કિંગ જ્યોર્જ હોસ્પિટલ લઈ જવામાં આવ્યો હતો, જ્યાં તબીબોએ તેને મૃત જાહેર કર્યો હતો. જોકે, બાળકનું મોત ચોક્કસ કયા કારણસર થયું તે અંગે હજુ સત્તાવાર પુષ્ટિ થઈ નથી અને પોસ્ટમોર્ટમ રિપોર્ટ બાદ વધુ સ્પષ્ટતા થવાની શક્યતા છે.
ક્લાસરૂમમાં શું થયું?
પરિવારજનોના આક્ષેપ મુજબ, બાળક હોમવર્ક કરીને ન આવ્યો હોવાના કારણે શિક્ષકે તેની સાથે કડક વર્તન કર્યું હતું. સોશિયલ મીડિયા પર સામે આવેલા CCTV ફૂટેજમાં શિક્ષક બાળકને પોતાની તરફ ખેંચતી જોવા મળે છે. પરિવારના આરોપ મુજબ, આ દરમિયાન બાળકના કપડાં ઉતારવાનો પ્રયાસ પણ કરવામાં આવ્યો હતો.
ફૂટેજમાં બાળક રડતો અને શિક્ષકને રોકવાનો ઈશારો કરતો જોવા મળતો હોવાનો દાવો કરવામાં આવ્યો છે. થોડીવાર બાદ શિક્ષક બાળક સાથે કંઈક વાત કરે છે અને તેના ગાલ પર થપ્પડ મારતી જોવા મળે છે. ત્યારબાદ બાળક થોડા સમય માટે ઊભો રહે છે અને પછી અચાનક બેભાન થઈને શિક્ષક તરફ ઢળી પડે છે.
Visakhapatnam School Case: શિક્ષકની મારપીટથી મોત થયાનો પરિવારનો આરોપ
ઘટના બાદ બાળકને તાત્કાલિક કિંગ જ્યોર્જ હોસ્પિટલ લઈ જવામાં આવ્યો હતો. જોકે, હોસ્પિટલમાં તબીબોએ તેને મૃત જાહેર કર્યો હતો. બાળકના મોતના સમાચાર મળતા પરિવારજનો અને સંબંધીઓમાં ભારે આક્રોશ જોવા મળ્યો હતો. તેમણે હોસ્પિટલની બહાર વિરોધ નોંધાવી બાળકના મોત માટે જવાબદાર લોકો સામે કડક કાર્યવાહી કરવાની માગ કરી હતી .પરિવારનો આરોપ છે કે શિક્ષકની મારપીટ અને બાળકમાં ઊભા થયેલા ભયને કારણે તેની તબિયત લથડી હતી.
CCTV ફૂટેજથી મામલો સામે આવ્યો
આ સમગ્ર ઘટના ક્લાસરૂમમાં લાગેલા CCTV કેમેરામાં કેદ થઈ હોવાનું જણાવવામાં આવ્યું છે. ફૂટેજ સોશિયલ મીડિયા પર વાયરલ થયા બાદ મામલો વધુ ચર્ચામાં આવ્યો. CCTVમાં શિક્ષક અને બાળક વચ્ચેની ઘટનાક્રમની કેટલીક ક્ષણો જોવા મળે છે. જોકે, વાયરલ થયેલા ફૂટેજના આધારે બાળકના મોતનું ચોક્કસ તબીબી કારણ નક્કી કરી શકાય તેમ નથી. હવે પોલીસ CCTV ફૂટેજ સહિત અન્ય પુરાવાઓની તપાસ કરી રહી છે.
Visakhapatnam School Case: શું બાળકને પહેલાથી કોઈ બીમારી હતી?
બાળકના મોતનું ચોક્કસ કારણ જાણવા માટે પોલીસ તેની મેડિકલ હિસ્ટ્રીની પણ તપાસ કરશે. અધિકારીઓ એ જાણવાનો પ્રયાસ કરી રહ્યા છે કે બાળકને અગાઉથી કોઈ હૃદય સંબંધિત અથવા અન્ય બીમારી હતી કે કેમ. બાળકના મૃત્યુનું અંતિમ કારણ પોસ્ટમોર્ટમ રિપોર્ટ અને તબીબી તપાસ બાદ જ સ્પષ્ટ થઈ શકશે. પરિવાર દ્વારા બાળકને હાર્ટ એટેક આવ્યો હોવાનો દાવો કરવામાં આવી રહ્યો છે, પરંતુ આ દાવાની સત્તાવાર તબીબી પુષ્ટિ હજુ બાકી છે.
Visakhapatnam School Case: પોલીસ તપાસમાં શું થશે?
પોલીસે સમગ્ર ઘટનાની તપાસ શરૂ કરી છે. તપાસમાં CCTV ફૂટેજ, શાળા (Visakhapatnam School Case)માં બનેલી ઘટનાની વિગતો, બાળકની મેડિકલ હિસ્ટ્રી અને પોસ્ટમોર્ટમ રિપોર્ટ સહિતના મુદ્દાઓને ધ્યાનમાં લેવામાં આવશે. બાળકના પરિવારજનોએ ઘટના માટે જવાબદાર લોકો સામે કડક કાયદેસરની કાર્યવાહી કરવાની માગ કરી છે. હાલ સમગ્ર મામલે તપાસ ચાલુ છે અને પોસ્ટમોર્ટમ રિપોર્ટ બાદ બાળકના મોતનું ચોક્કસ કારણ તથા ઘટનાની જવાબદારી અંગે વધુ સ્પષ્ટતા થવાની શક્યતા છે.
આ પણ વાંચો:જૂનાગઢ આલ્ફા વિદ્યા સંકુલ હોસ્ટેલમાં મારપીટના આક્ષેપ, ડાયરેક્ટરે કહ્યું- આરોપો પાયાવિહોણા
આ પણ વાંચો:રાજકોટમાં ટ્યુશન ક્લાસમાં વિદ્યાર્થીને માર મારવાનો આરોપ, કુરકુરે ખાવાની બાબતે શિક્ષક વિવાદમાં
આ પણ વાંચો:ભાવનગરમાં ડોળીયા ગામે વાલીઓએ પ્રાથમિક શાળા પર તાળા લગાવ્યા, આચાર્ય-શિક્ષકોની બદલીની માંગ
