બિહારમાં નીતીશ કુમારની સરકાર બદલવાની અટકળો અંગે કેન્દ્રીય ગૃહમંત્રી અમિત શાહે બિહારના મુખ્યમંત્રી સાથે ફોન પર વાત કરી છે. એવી અટકળો ચાલી રહી છે કે નીતિશ કુમાર અનેક કારણોસર ભાજપથી નારાજ છે અને NDA ગઠબંધન છોડી શકે છે અને તેજસ્વી યાદવની આરજેડીની આગેવાની હેઠળના મહાગઠબંધન સાથે નવી સરકાર બનાવી શકે છે. શરૂઆતથી જ એવું માનવામાં આવતું હતું કે જો ભાજપ નેતૃત્વ મનાવશે તો નીતિશ રાજી થશે. હવે જ્યારે અમિત શાહ અને નીતીશ કુમારે ફોન પર વાત કરી છે ત્યારે ભાજપ-જેડીયુ ગઠબંધન ચાલુ રહેશે તેવી અટકળો શરૂ થઈ ગઈ છે.
આવતીકાલે એટલે કે મંગળવારે પટનામાં હાઈવોલ્ટેજ રાજકીય બેઠકો છે. નીતિશ કુમારે JDU ધારાસભ્ય દળની સાથે સાંસદોની બેઠક બોલાવી છે. લાલુ યાદવની આરજેડી વિધાનસભ્ય દળની બેઠક સોમવારે થવાની હતી પરંતુ તેને મંગળવારે સવાર સુધી સ્થગિત કરી દેવામાં આવી છે. સોમવારે સાંજે કોંગ્રેસ વિધાયક દળની બેઠક યોજાઈ છે જેમાં રાજ્યના પ્રભારી ભક્ત ચરણ દાસ પણ ભાગ લેવા પહોંચ્યા છે. આ હંગામાની વચ્ચે નીતિશે રવિવારે કોંગ્રેસના વચગાળાના અધ્યક્ષ સોનિયા ગાંધી સાથે ફોન પર વાતચીત કરી હતી.
ઉલ્લેખનીય છે કે જેડીયુમાંથી પૂર્વ કેન્દ્રીય મંત્રી આરસીપી સિંહના રાજીનામા બાદ બિહારમાં રાજકીય હલચલ તેજ થઈ ગઈ છે. હાલમાં જ જેડીયુના કેટલાક નેતાઓએ આરસીપી સિંહ પર ભ્રષ્ટાચારનો આરોપ લગાવ્યો હતો, જે બાદ તેમણે રાજીનામું આપી દીધું હતું. રાજીનામા બાદ તેમણે કહ્યું કે નીતીશ કુમાર સાત જન્મો સુધી પણ વડાપ્રધાન બની શકશે નહીં. આરસીપીના તીક્ષ્ણ નિવેદન બાદ જેડીયુ પ્રમુખ લલન સિંહે પણ વળતો પ્રહાર કર્યો હતો. તેમણે કહ્યું કે આરસીપી સિંહનું શરીર જેડીયુમાં છે અને તેમનું મન બીજે છે. લલન સિંહે વધુમાં કહ્યું કે વહેલા કે મોડા આરસીપી સિંહે આ પાર્ટી છોડવી પડશે.
બિહારમાં આરજેડી અને જેડીયુ સાથે મળીને સરકાર બનાવવાની ચર્ચા જોરશોરથી ચાલી રહી છે. એવી ચર્ચા છે કે નીતીશ કુમાર ફરી એકવાર ભાજપનો સાથ છોડીને લાલુ યાદવની આરજેડીનો હાથ પકડી શકે છે. જો કે, આરજેડીના પ્રદેશ અધ્યક્ષે સ્પષ્ટપણે નકારી કાઢ્યું છે કે આરજેડી અને જેડીયુનું કોઈ ગઠબંધન નહીં થાય. તેમણે સ્પષ્ટ કહ્યું કે અમે નીતિશ કુમાર સાથે સરકાર નહીં બનાવીએ.
