Delhi News: દિલ્હી હાઈકોર્ટે પ્રેમ સંબંધોને લઈને મહત્વની ટિપ્પણી કરી છે. એક કેસની સુનાવણી દરમિયાન હાઈકોર્ટે કહ્યું છે કે જો પ્રેમમાં નિષ્ફળતા બાદ યુવક આપઘાત કરે છે તો તેના માટે મહિલાને દોષિત ઠેરવી શકાય નહીં. મૃતકે એક સુસાઈડ નોટ પણ મૂકી હતી, જેમાં મહિલાની સાથે અન્ય વ્યક્તિને પણ જવાબદાર ઠેરવવામાં આવી હતી.
લાઈવ લોના રિપોર્ટ અનુસાર હાઈકોર્ટમાં સુનાવણી કરી રહેલા જસ્ટિસ અમિત મહાજને કહ્યું કે જો કોઈ નબળી માનસિકતા ધરાવનાર વ્યક્તિ આવું પગલું ભરે છે તો તેના માટે અન્ય કોઈ વ્યક્તિને દોષી ઠેરવી શકાય નહીં. કોર્ટે કહ્યું, ‘જો પ્રેમમાં નિષ્ફળતાના કારણે પ્રેમી આત્મહત્યા કરે, પરીક્ષામાં નબળા પ્રદર્શનને કારણે વિદ્યાર્થી આત્મહત્યા કરે, કેસ ડિસમિસ થયા પછી જો કોઈ ક્લાયન્ટ આત્મહત્યા કરે તો મહિલા, સુપરવાઈઝર, વકીલને ઉશ્કેરવા માટે આત્મહત્યા માટે જવાબદાર ગણી શકાય નહીં.
તેમણે કહ્યું, ‘નબળી માનસિકતા ધરાવતી વ્યક્તિ દ્વારા લેવામાં આવેલા નિર્ણયને અન્ય વ્યક્તિને આત્મહત્યા માટે ઉશ્કેરવા માટે જવાબદાર ન ગણી શકાય.’ કોર્ટે મહિલા અને અન્ય એક પુરુષને આત્મહત્યા માટે ઉશ્કેરવાના કેસમાં આગોતરા જામીન મંજૂર કર્યા છે.
શું હતો મામલો
મૃતકના પિતાએ નોંધાવેલી ફરિયાદના આધારે FIR નોંધવામાં આવી હતી. અરજદાર મહિલાને આપઘાત કરનાર પુરુષ સાથે પ્રેમ સંબંધ હતો. જ્યારે, બીજો અરજદાર તેમનો કોમન ફ્રેન્ડ હતો. આક્ષેપો એવા હતા કે, અરજદારોએ મૃતકને એવું કહીને ઉશ્કેર્યા હતા તેઓએ શારીરિક સંબંધો બાંધ્યા છે અને ટૂંક સમયમાં એકબીજા સાથે લગ્ન કરવાના છે.
કોર્ટે કહ્યું કે વ્હોટ્સએપ ચેટ્સ પ્રથમદર્શી રીતે દર્શાવે છે કે મૃતક સંવેદનશીલ સ્વભાવનો હતો. તેમણે વધુમાં કહ્યું કે જ્યારે પણ મહિલા વાત કરવાની ના પાડતી ત્યારે તે તેને આત્મહત્યાની ધમકી આપીને ડરાવતો હતો. કોર્ટે એમ પણ કહ્યું હતું કે ટ્રાયલ દરમિયાન કથિત સુસાઈડ નોટના તથ્યો જોવામાં આવશે. અરજદારો તરફથી કોઈ ઉશ્કેરણી કરવામાં આવી હતી કે કેમ તે પણ જોવામાં આવશે.
આ પણ વાચો:રામ નવમીને લઈને અયોધ્યામાં કડક સુરક્ષા વ્યવસ્થા, 560 કેમેરા ભક્તોની અવરજવર પર નજર રાખશે
આ પણ વાચો:રેલ્વે વિભાગે આપ્યા ખુશ ખબર, વંદેભારત એક્સપ્રેસ બાદ ભારત બનાવાશે સ્વદેશી બુલેટ ટ્રેન
