હિમાચલમાં તાજી હિમવર્ષાથી લોકોની મુશ્કેલી વધી છે. હિમાચલ પ્રદેશના લાહૌલ સ્પીતિમાં શીત લહેર ચાલી રહી છે. હિમવર્ષાના કારણે છ ઈટાલિયનો સહિત 17 પ્રવાસીઓ મઠમાં ફસાયેલા છે. હિમાચલમાં તાજી હિમવર્ષાને કારણે લઘુત્તમ તાપમાન માઈનસ 15 થી 20 ડિગ્રી સેલ્સિયસ સુધી પહોંચી ગયું છે. સોલન જિલ્લાના ધરમપુર વિસ્તારના ગહર ગામમાં ભૂસ્ખલનને કારણે બિહારના બે મજૂરોના મોત થયા છે. એવું કહેવાય છે કે સોમવારે રાત્રે જ્યારે બંને મજૂરો ઘરમાં સૂતા હતા ત્યારે એક ખડક અંદર ખાબકી હતી અને સુખારી મુખિયા (31) અને બેઝ મુખિયા (46) કાટમાળ નીચે દટાઇ ગયા હતા,છે જ્યારે ભૂસ્ખલનને કારણે બિહારના બે લોકોના મોત થયા છે.
પોલીસનું કહેવું છે કે બંને ચાર દિવસ પહેલા ગહર ગામમાં આવ્યા હતા. લાહૌલ સ્પીતિ જિલ્લામાં હિમપ્રપાતની ચેતવણીને ધ્યાનમાં રાખીને પોલીસ અધિક્ષક મયંક ચૌધરીએ મંગળવારે બરફવર્ષાથી પ્રભાવિત વિવિધ વિસ્તારોની મુલાકાત લીધી હતી. તેમણે કહ્યું કે સોમવારે સ્પીતિ સબ-ડિવિઝનમાં સ્થાનિક લોકોને માહિતી મળી હતી કે છ વિદેશીઓ સહિત 17 પ્રવાસીઓ ફસાયા છે. અમિત, વિકાસ અનિલ તુષીર, નવીન રાણા, મનીષ, દીપક મલિક અને રેહનત રાજ્યના કાઝા ક્ષેત્રમાં સ્નો ફ્લેક્સ હોમસ્ટેમાં રોકાયેલા પ્રવાસીઓમાં સામેલ છે.
લાહૌલ-સ્પીતિમાં ભારે હિમવર્ષાને કારણે મોબાઈલ કનેક્ટિવિટી પણ પ્રભાવિત થઈ છે. હિમવર્ષાના કારણે વિવિધ સ્થળોએ ફસાયેલા પ્રવાસીઓના પરિવારજનોનો સંપર્ક કરીને તેમની સુખાકારી વિશે માહિતી આપવામાં આવી છે. વહીવટીતંત્રે કહ્યું કે બોર્ડર રોડ ઓર્ગેનાઈઝેશને રસ્તો ખોલવા માટે JCB અને બરફ તોડવાનું મશીન તૈનાત કર્યું છે. હિમવર્ષાના વિસ્તારમાં મોબાઈલ કનેક્ટિવિટીની સમસ્યાને દૂર કરવા માટે કર્મચારીઓને તૈનાત કરવામાં આવ્યા છે. રાજ્યમાં 60 કલાકની હિમવર્ષાના કારણે, વાયરલેસ સેટેલાઇટ ફોન અને વોકી-ટોકી દ્વારા સંદેશાવ્યવહાર સેવાઓ અને માહિતી પહોંચાડવામાં આવી રહી છે.
હિમાચલ પ્રદેશના મોટા ભાગના વિસ્તારોમાં કોલ્ડવેવના કારણે થીજી ગયેલી ઠંડીનો અનુભવ થઈ રહ્યો છે. કીલોંગમાં રાત્રિનું લઘુત્તમ તાપમાન માઈનસ 10.8 ડિગ્રી સેલ્સિયસ નોંધાયું હતું. નારકંડામાં માઈનસ 0.6 ડિગ્રી, કલ્પામાં માઈનસ 3.0 ડિગ્રી, મનાલીમાં 0.1 ડિગ્રી, કુફરીમાં 0.5 ડિગ્રી, સરાહનમાં 1 ડિગ્રી, ડેલહાઉસીમાં 2.0 ડિગ્રી, શિમલા અને સોલનમાં 2.2 ડિગ્રી તાપમાન નોંધાયું હતું. હિમસ્ખલન અને ભૂસ્ખલનને કારણે સોમવારે રાજ્યમાં 650 થી વધુ રસ્તાઓ બંધ થઈ ગયા હતા. લાહૌલ અને સ્પીતિ જિલ્લા સૌથી વધુ પ્રભાવિત થયા છે જ્યાં 290 રસ્તાઓ બંધ છે.
લાહૌલ અને સ્પીતિના વિસ્તારોમાં છેલ્લા 60 કલાકથી વીજળી નથી. શિમલામાં 158, ચંબામાં 63, કિન્નૌરમાં 50, કુલ્લુમાં 32, મંડીમાં સાત રસ્તાઓ બંધ છે. હવામાન વિભાગે ગુરુવારે હિમાચલમાં વિવિધ સ્થળોએ ભારે પવન, વાવાઝોડા સાથે વરસાદ અને હિમવર્ષા માટે યલો એલર્ટ જાહેર કર્યું છે. નવીનતમ વેસ્ટર્ન ડિસ્ટર્બન્સના કારણે હિમાચલ પ્રદેશમાં વરસાદ અને હિમવર્ષાની ચેતવણી જારી કરવામાં આવી છે. હવામાન વિભાગે 7 માર્ચ સુધી હળવાથી મધ્યમ વરસાદ અને હિમવર્ષાની આગાહી કરી છે.
