દેશના આ રાજ્યમાં પણ છે હજી રાજાશાહી શાસન, સરકાર હજી પણ આપે છે પેન્શન

Gujarat/ દેશના આ રાજ્યમાં પણ છે હજી રાજાશાહી શાસન, સરકાર હજી પણ આપે છે પેન્શન

આઝાદી બાદ દેશમાં રાજાશાહીનો અંત આવ્યો છે. પરંતુ ગુજરાત એકમાત્ર રાજ્ય છે જ્યાં રાજા હજુ પણ અસ્તિત્વ ધરાવે છે.

આઝાદી બાદ દેશમાં રાજાશાહીનો અંત આવ્યો છે. પરંતુ ગુજરાત એકમાત્ર રાજ્ય છે જ્યાં રાજા હજુ પણ અસ્તિત્વ ધરાવે છે. ભારતના તમામ રાજાઓને એક કર્યા અને રાજાશાહીને નાબૂદ કરનાર સરદાર પટેલના ગુજરાતના આદિવાસી બહુલ ડાંગ જિલ્લાના આદિવાસી ભીલ રાજાને તેમની બહાદુરી અને બલિદાનની સાથે જંગલનું રક્ષણ કરવ માટે પુરસ્કાર તરીકે બ્રિટિશ સરકાર દ્વારા 1842 થી રાજકીય પેન્શન આપવામાં આવે છે.

વર્ષોથી ચાલી આવતી આ પરંપરાને ગુજરાત સરકારે આજે પણ જાળવી રાખી છે. આઝાદીના આટલા વર્ષો પછી પણ અહીંના પાંચ પરંપરાગત રાજાઓનું વર્ષમાં એકવાર સન્માન કરવામાં આવે છે. તેમની શાહી સરઘસ કાઢવામાં આવે છે અને પ્રજાજનો વચ્ચે દરબાર યોજીને નિશ્ચિત રાજકીય પેન્શન આપવામાં આવે છે.

રાજાઓને પેન્શન આપવાના આ અવસર પર પાંચ દિવસનો મોટો મેળો યોજાય છે, જેને ‘ડાંગ દરબાર’ કહેવામાં આવે છે. વાસ્તવમાં, આ સન્માન માટે, ગુજરાતના રાજ્યપાલ પોતે આવે છે અને દરબારની શોભા વધારે છે. પરંતુ આ વખતે લોકસભાની ચૂંટણી છે તેથી રાજ્યપાલને બદલે જિલ્લા વિકાસ અધિકારી દ્વારા રાજાઓનું સન્માન કરવામાં આવ્યું હતું.

ડાંગ દરબારની વાત કરીએ તો આ પાંચ દિવસીય મેળામાં દેશની વિવિધ આદિવાસી સંસ્કૃતિની ઝલક સાથે રંગારંગ કાર્યક્રમોનું આયોજન કરવામાં આવે છે, જેને જોવા માટે લાખોની સંખ્યામાં લોકો દૂર-દૂરથી આવે છે. રાજાનું માનવું છે કે આ જંગલ આદિવાસીઓ માટે એટીએમ જેવું છે.

તેઓ અહીંના લાકડા અને વનસ્પતિ પર સારી રીતે ટકી રહે છે. તેથી રાજા પોતાની પ્રજાને જંગલ બચાવવા માટે અપીલ કરે છે. વન વિભાગના અધિકારીઓ પણ રાજાઓને જંગલ બચાવવામાં આપેલા યોગદાનને માન આપે છે અને આવનારી પેઢીઓ માટે જંગલ બચાવવા લોકોને અપીલ કરે છે.