કોરોના વાયરસના ત્રીજા મોજાના ભય વચ્ચે દેશ માટે એક સારા સમાચાર સામે આવ્યા છે. મધ્ય પ્રદેશ, રાજસ્થાન, બિહાર અને ગુજરાત સહિત દેશના ઘણા રાજ્યોના લોકોમાં 70 ટકાથી વધુ કોવિડ એન્ટિબોડીઝ મળી આવી છે. ઇન્ડિયન કાઉન્સિલ ઓફ મેડિકલ રિસર્ચ (આઈસીએમઆર) દ્વારા ગયા મહિને હાથ ધરવામાં આવેલા સેરો સર્વે રિપોર્ટમાં માલુમ પડ્યું છે કે મધ્યપ્રદેશની 79 ટકા અને રાજસ્થાનની 76 ટકા વસ્તી કોરોના વાયરસ સામે એન્ટિબોડીઝ ધરાવે છે. સાથે જ કેરળ આ મામલે પાછળ છે. અહીંના માત્ર 44 ટકા લોકોમાં જ એન્ટિબોડીઝ મળી આવી છે.
મધ્ય પ્રદેશ પછી કોવિડ -19 એન્ટિબોડીઝની દ્રષ્ટિએ રાજસ્થાન બીજા ક્રમે આવે છે. રિપોર્ટ અનુસાર, જૂન-જુલાઈમાં રાજસ્થાનના જુદા જુદા શહેરોમાંથી કુલ 1,226 રેન્ડમ નમૂના લેવામાં આવ્યા હતા. જ્યારે આ નમૂનાઓનું પરીક્ષણ કરવામાં આવ્યું ત્યારે 934 નમૂનાઓમાં એન્ટિબોડીઝ મળી આવી. આ સર્વેક્ષણ અહેવાલમાં રાજ્યના લોકોમાં કોવિડ એન્ટિબોડીઝની હાજરી સૂચવવામાં આવી છે.
સેરો સર્વે અહેવાલમાં વધુમાં જણાવાયું છે કે દેશભરમાં સૌથી વધુ એન્ટિબોડીઝ મધ્યપ્રદેશના લોકોમાં જોવા મળી છે, જે લગભગ 79ટકા વસ્તી છે. રાજસ્થાનમાં કોરોનાની બીજી લહેર દરમિયાન, અઢી મહિનામાં (એપ્રિલ, મે અને મધ્ય જૂન સુધી) આશરે 6 લાખ પોઝિટિવ કેસ મળ્યા. કોરોના વાયરસને કારણે 6,000 થી વધુ લોકોએ પોતાનો જીવ ગુમાવ્યો હતો.
અહેવાલમાં જણાવાયું છે કે મધ્યપ્રદેશ તેની 79 ટકા વસ્તીમાં એન્ટિબોડીઝ સાથેની યાદીમાં આગળ છે, જ્યારે રાજસ્થાન 76.2 ટકા સાથે બીજા ક્રમે છે. તે જ સમયે, બિહારમાં 75.9 ટકા, ગુજરાતમાં 75.3 ટકા, છત્તીસગઢ માં 74.6 ટકા, ઉત્તરાખંડમાં 73.1 ટકા, ઉત્તર પ્રદેશમાં71 ટકા અને આંધ્રપ્રદેશમાં 70.2 ટકા એન્ટિબોડીઝ મળ્યાં છે.
