ભારતીય મૂળના ડૉ.અનિલ મેનને અમેરિકાની સ્પેસ એજન્સી નાસામાંથી બે વર્ષની તાલીમ પૂર્ણ કરી છે. તેમને અવકાશયાત્રી તરીકે તાલીમ આપવામાં આવી હતી. ડિસેમ્બર 2021 માં, નાસાએ તેના ચંદ્ર મિશન માટે 10 તાલીમાર્થી અવકાશયાત્રીઓની પસંદગી કરી હતી. જેમાં ભારતીય મૂળના ડો.અનિલ મેનનનો સમાવેશ થતો હતો. હવે જ્યારે ડૉ. મેનનની તાલીમ પૂરી થઈ ગઈ છે અને ભવિષ્યમાં નાસા કોઈ પણ મૂન મિશન શરૂ કરે છે, તો શક્ય છે કે ડૉ. મેનન પણ તેનો ભાગ બની શકે. જો આમ થશે તો તે ચંદ્ર પર જનાર પ્રથમ ભારતીય હશે. ડો. મેનન મેડિસિન અને એરોસ્પેસમાં એક પ્રખ્યાત કારકિર્દી ધરાવે છે. મિનેપોલિસ, મિનેસોટામાં જન્મેલા ડૉ. મેનનના માતા-પિતા ભારતીય અને યુક્રેનિયન હતા.
1999 માં હાર્વર્ડ યુનિવર્સિટીમાંથી ન્યુરોબાયોલોજીમાં સ્નાતક થયા. અહીં તેમણે હચિન્સન રોગનો અભ્યાસ કર્યો હતો. આ પછી, તેણે 2004 માં સ્ટેનફોર્ડ મેડિકલ સ્કૂલમાંથી દવાનો અભ્યાસ કર્યો. પછી સ્ટેનફોર્ડ યુનિવર્સિટીમાંથી મિકેનિકલ એન્જિનિયરિંગ કર્યું. અનિલે નાસાના ઘણા મિશનમાં ફ્લાઈટ સર્જન તરીકે પણ કામ કર્યું છે. તેણે આ કામ વર્ષ 2014માં શરૂ કર્યું હતું. આ સિવાય તે સોયુઝ મિશનનો પણ હિસ્સો રહી ચૂક્યો છે.
એટલું જ નહીં, ડૉ. મેનન ઇન્ટરનેશનલ સ્પેસ સ્ટેશન પર નાસાના ઘણા મિશન માટે ક્રૂ ફ્લાઇટ સર્જન તરીકે પણ કામ કરી ચૂક્યા છે. ડૉ.મેનન યુએસ એરફોર્સમાં લેફ્ટનન્ટ કર્નલ પણ રહી ચૂક્યા છે.નાસામાં જોડાતા પહેલા, ડૉ. મેનન 2018માં એલોન મસ્કના સ્પેસએક્સમાં જોડાયા હતા. ડો. મેનન SpaceX ના પ્રથમ ફ્લાઇટ સર્જન હતા. અહીં તેણે સ્પેસએક્સની પ્રથમ માનવ ઉડાનના મેડિકલ પ્રોગ્રામમાં મદદ કરી.
