મહારાષ્ટ્રમાં અનામત મુદ્દે ચાલી રહેલા આંદોલનને લઈને એક મોટા સમાચાર સામે આવી રહ્યા છે. અહીં સર્વપક્ષીય બેઠક બાદ એક ઠરાવ પસાર કરવામાં આવ્યો હતો, જેમાં મનોજ જરાંગે પાટીલને તેમની અનિશ્ચિત ભૂખ હડતાળ પાછી ખેંચી લેવા વિનંતી કરવામાં આવી હતી. મુખ્યમંત્રી એકનાથ શિંદેએ કહ્યું કે, સરકાર દ્વારા અનામત મુદ્દાને ઉકેલવા માટે કરવામાં આવી રહેલા પ્રયાસોને ધ્યાનમાં રાખીને પાટીલને આ વિનંતી કરવામાં આવી છે. સીએમ શિંદેએ વધુમાં કહ્યું કે સરકારે નિર્ણય લીધો છે કે આ સિવાય જાલનામાં આંદોલન દરમિયાન મરાઠા કાર્યકર્તાઓ પર નોંધાયેલા તમામ કેસ પાછા ખેંચવામાં આવશે.એટલું જ નહીં સરકારે એ પણ નિર્ણય લીધો છે કે તે ત્રણ પોલીસ અધિકારીઓને સસ્પેન્ડ કરવામાં આવશે જેમણે 1 સપ્ટેમ્બરે જાલનામાં પ્રદર્શનકારીઓ પર લાઠીચાર્જ કર્યો હતો.
નોધનીય છે કે શિંદેએ જણાવ્યું હતું કે સરકાર મરાઠાઓને કુણબી પ્રમાણપત્રો કેવી રીતે આપવા તે નક્કી કરવા માટે રચાયેલી ન્યાયમૂર્તિ શિંદે સમિતિમાં જરાંગે પાટીલ અથવા તેમના નામાંકિતની નિમણૂક કરવા તૈયાર છે. મરાઠા આરક્ષણ પર ચર્ચા કરવા માટે બોલાવવામાં આવેલી સર્વપક્ષીય બેઠક પર મહારાષ્ટ્ર કોંગ્રેસના નેતા બાલાસાહેબ થોરાટે કહ્યું કે મારી પાર્ટી અને હું માનું છું કે આના પર કોઈ રાજનીતિ ન થવી જોઈએ. અમે મુખ્યમંત્રી એકનાથ શિંદેને સાંભળીશું અને સરકાર દ્વારા લેવામાં આવેલી સકારાત્મક પહેલને સમર્થન આપીશું.
મહારાષ્ટ્રના જાલના જિલ્લામાં મરાઠા આરક્ષણ માટેનો વિરોધ શુક્રવારે હિંસક બન્યો હતો. મનોજ જરાંગેના નેતૃત્વમાં વિરોધીઓ મરાઠા સમુદાય માટે આરક્ષણની માંગ સાથે ભૂખ હડતાળ પર હતા. હિંસામાં 12 પોલીસકર્મીઓ અને 20 આંદોલનકારીઓ ઘાયલ થયા હતા. પરિસ્થિતિને કાબૂમાં લેવા માટે જાલનામાં વધારાની પોલીસ દળ તૈનાત કરવામાં આવી હતી. તે જ સમયે, સીએમ એકનાથ શિંદેએ શાંતિની અપીલ કરી હતી અને હિંસાની તપાસ માટે એક સમિતિની રચના કરવાની જાહેરાત કરી હતી.
