તમિલનાડુમાં આવ્યું ભયંકર પૂર,ત્રણના મોત, NDRF ટ્રેનમાં ફસાયેલા 800 મુસાફરોને બહાર કાઢવામાં વ્યસ્ત

હાલ તમિલનાડુના દક્ષિણ જિલ્લાઓ આ દિવસોમાં પૂર જેવી સ્થિતિનો સામનો કરી રહ્યા છે.ત્યારે વાસ્તવમાં આ જિલ્લાઓમાં છેલ્લા ત્રણ દિવસથી ભારે વરસાદ પડી રહ્યો છે. જેના કારણે અનેક વિસ્તારો પાણીમાં ડૂબી ગયા છે. માહિતી અનુસાર, તમિલનાડુમાં વરસાદ અને પૂરના કારણે સર્જાયેલા સંજોગોમાં ત્રણ લોકોના મોત થયા છે. તમિલનાડુના થૂથુકુડી જિલ્લામાં રવિવારે ઘણી જગ્યાએ 525 મીમી વરસાદ થયો હતો. જેના કારણે થૂથુકુડીમાં પૂરના કારણે સામાન્ય જનજીવન ખરાબ રીતે પ્રભાવિત થયું છે. હવામાન વિભાગની તાજેતરની આગાહીએ પૂરથી પીડિત લોકોની મુશ્કેલીમાં વધુ વધારો કર્યો છે. પૂર પ્રભાવિત વિસ્તારોમાં એરફોર્સના હેલિકોપ્ટરથી ફૂડ પેકેટ અને અન્ય આવશ્યક ચીજવસ્તુઓ ઉતારવામાં આવી રહી છે.

વાસ્તવમાં, હવામાન વિભાગે કહ્યું છે કે મંગળવારે પણ તમિલનાડુના ઘણા જિલ્લાઓમાં હળવોથી ભારે વરસાદ પડી શકે છે. ચેન્નાઈ હવામાન વિભાગે કહ્યું છે કે આગામી ત્રણ કલાકમાં કરાઈકલ અને તમિલનાડુના અન્ય ઘણા જિલ્લાઓમાં વીજળીના ચમકારા સાથે ભારે વરસાદ થઈ શકે છે. જે જિલ્લાઓમાં ભારે વરસાદની અપેક્ષા છે તેમાં પુડુકોટ્ટાઈ, તંજાવુર, તિરુવર, નાગપટ્ટિનમ, રામનાથપુરમ અને શિવગંગાઈનો સમાવેશ થાય છે. થેની, તેનકાસી, કન્યાકુમારી, થિરુનેલવેલી, થૂથુકુડી અને વિરુધુનગર જિલ્લામાં હળવા વરસાદની અપેક્ષા છે.

ટ્રેનમાં ફસાયેલા મુસાફરોને બચાવવાના પ્રયાસો ચાલુ છે.

તમિલનાડુના દક્ષિણી જિલ્લાઓમાં ભારે વરસાદને કારણે ટ્રેન વ્યવહાર પર ખરાબ અસર પડી છે. છેલ્લા 24 કલાકમાં લગભગ 670 mm અને 932 mm વરસાદને કારણે તિરુનેલવેલી અને તુતીકોરિન જિલ્લામાં ટ્રેન સેવાઓ ખોરવાઈ ગઈ છે. અનેક સ્ટેશનો પર પાણી ભરાઈ ગયા છે. તે જ સમયે, ટ્રેન સેવાઓમાં વિક્ષેપ અને ભારે વરસાદને કારણે, 800 મુસાફરો તિરુચેન્દુર અને તિરુનેલવેલી સ્ટેશનો વચ્ચે ચાલતી ટ્રેનમાં અટવાયા છે, સ્થાનિક જિલ્લા વહીવટીતંત્ર અને NDRFની મદદથી તેમને સુરક્ષિત સ્થાનો પર લઈ જવાની તૈયારીઓ કરવામાં આવી રહી છે. NDRFએ કહ્યું છે કે તેની બે ટીમો ફસાયેલા રેલવે મુસાફરો સુધી પહોંચવાનો પ્રયાસ કરી રહી છે. વાયુસેના પૂરગ્રસ્ત વિસ્તારોમાંથી લોકોને સુરક્ષિત રીતે બહાર કાઢવા માટે કામગીરી કરી રહી છે. લોકોને એર લિફ્ટ કરવામાં આવી રહ્યા છે. એક સગર્ભા મહિલા અને દોઢ વર્ષની બાળકી સહિત ચાર મુસાફરોને એરફોર્સે સુરક્ષિત રીતે બચાવી લીધા હતા.

સીએમ સ્ટાલિન વડાપ્રધાનને મળશે

તમિલનાડુના સીએમ એમકે સ્ટાલિને કહ્યું છે કે ચેન્નાઈ હવામાન વિભાગે 17 અને 18 ડિસેમ્બરે ભારે વરસાદની આગાહી કરી હતી, પરંતુ વરસાદ અપેક્ષા કરતાં વધુ હતો. ઐતિહાસિક વરસાદ હતો અને અમને ચેતવણી પણ મોડી મળી હતી. તેમ છતાં તમિલનાડુ સરકારે રાહત અને બચાવ કામગીરી માટે પૂરતી વ્યવસ્થા કરી હતી. મુખ્યમંત્રી સ્ટાલિન આજે સાંજે વડાપ્રધાન મોદીને મળશે અને પૂરની સ્થિતિ વિશે જાણકારી આપશે. તમને જણાવી દઈએ કે તમિલનાડુના તટીય વિસ્તાર કેપ કોમરીનમાં ચક્રવાત સર્જાવાને કારણે છેલ્લા બે-ત્રણ દિવસથી રાજ્યના દક્ષિણી જિલ્લાઓમાં ભારે વરસાદ થઈ રહ્યો છે. દક્ષિણના જિલ્લાઓમાં ઘણી નદીઓ અને તળાવો છલકાઈ રહ્યા છે. પૂરની સ્થિતિને ધ્યાનમાં રાખીને NDRF અને SDRFના જવાનોને કન્યાકુમારી, તિરુનેલવેલી, તુતીકોરીન અને તેનકસીમાં તૈનાત કરવામાં આવ્યા છે.