મધ્યપ્રદેશના દતિયા જિલ્લામાં ગણેશ વિસર્જન દરમિયાન એક મોટી દુર્ઘટના સામે આવી છે. જેમાં ચાર બાળકોના ડૂબી જવાથી મોત થયા છે. પ્રાપ્ત માહિતી અનુસાર જિલ્લાના નિરાવલ બિડનિયા ગામમાં ગણેશ વિસર્જન કરવા ગયેલા ચાર બાળકો નજીકના ખાડામાં ડૂબી જવાથી મૃત્યુ પામ્યા છે. ઘટના સમયે સ્થળ પર કોઈ હાજર નહોતું. નાના બાળકો ભગવાન ગણેશની મૂર્તિનું વિસર્જન કરવા ગયા હતા. તે દરમિયાન આ અકસ્માત થયો હતો. જેમાં ચાર બાળકોના મોત થયા હતા.
કહેવાય છે કે બાળકો મૂર્તિઓનું વિસર્જન કરી રહ્યા હતા. આ દરમિયાન 8 થી 10 બાળકો તળાવમાં ડૂબી ગયા હતા. નજીકમાં પૂજા કરી રહેલા એક વ્યક્તિએ 5 થી 6 બાળકોને બહાર કાઢ્યા હતા પરંતુ બાકીના ચાર બાળકોના મોત થયા હતા. મૃત્યુ પામેલાઓમાં ત્રણ છોકરીઓ અને એક છોકરો હોવાનું કહેવાય છે. પ્રત્યક્ષદર્શીઓના જણાવ્યા અનુસાર, તમામ બાળકોને બહાર કાઢવામાં આવ્યા ત્યાં સુધીમાં ચારના મોત થઈ ચૂક્યા હતા. તમામ બાળકોને જિલ્લા હોસ્પિટલમાં લાવવામાં આવ્યા છે. મૃતક બાળકોના મૃતદેહનું સવારે પોસ્ટમોર્ટમ કરવામાં આવશે.
અકસ્માતની માહિતી મળતા જ ઉચ્ચ અધિકારીઓ ઘટના સ્થળે પહોંચી ગયા હતા. દતિયાના પોલીસ અધિક્ષક પ્રદીપ શર્મા અને અધિક કલેક્ટર રૂપેશ ઉપાધ્યાય જિલ્લા હોસ્પિટલ પહોંચ્યા હતા. આ અકસ્માતમાં વહીવટીતંત્રની બેદરકારી પણ મહત્વની ભૂમિકા ભજવી હોવાનું કહેવાય છે. વાસ્તવમાં, આ 10 દિવસના ઉત્સવ દરમિયાન, ગામડાઓ અને શહેરોમાં વિવિધ સ્થળોએ ભગવાન ગણેશની મૂર્તિઓ સ્થાપિત કરવામાં આવે છે. વિસર્જન સ્થળો પર કોઈ વહીવટી કર્મચારીઓની નિમણૂક કરવામાં આવી નથી. લોકોનું કહેવું છે કે જો પ્રશાસને વ્યવસ્થા કરી હોત તો આવી ઘટના ન બની હોત.
