બ્રાઝિલના ઉત્તરપૂર્વીય રાજ્ય પરનામ્બુકોમાં શનિવારે ભારે વરસાદને કારણે થયેલા ભૂસ્ખલનમાં ઓછામાં ઓછા 29 લોકોના મોત થયા છે. આ પ્રદેશના અન્ય એક રાજ્ય અલાગોસમાં શુક્રવારે પૂરમાં નદી વહેવાથી બે લોકોના મોત થયા હતા. નાગરિક સંરક્ષણ અધિકારીઓએ જણાવ્યું હતું કે પરનામ્બુકોમાં પૂરના કારણે 1,000 થી વધુ લોકોને તેમના ઘર છોડવાની ફરજ પડી હતી.
32,000 પરિવારો પૂરગ્રસ્ત વિસ્તારોમાં રહે છે
પરનામ્બુકોમાં સિવિલ પ્રોટેક્શન એજન્સીના એક્ઝિક્યુટિવ સેક્રેટરી, લેફ્ટનન્ટ કર્નલ લિયોનાર્ડો રોડ્રિગ્સે Instagram પર પોસ્ટ કરેલા એક વીડિયોમાં જણાવ્યું હતું કે રાજ્યમાં લગભગ 32,000 પરિવારો ભૂસ્ખલન અથવા પૂરની સંભાવનાવાળા વિસ્તારોમાં રહે છે.
ઘણી જગ્યાએ ઈમરજન્સી જાહેર કરવામાં આવી છે
રેસિફ શહેરમાં બેઘર લોકો માટે શાળાઓ ખોલવામાં આવી છે. અલાગોસમાં, રાજ્ય સરકારે જણાવ્યું હતું કે છેલ્લા ઘણા દિવસોથી ભારે વરસાદની અસરોને કારણે 33 નગરપાલિકાઓએ કટોકટીની સ્થિતિ જાહેર કરી છે.
રાષ્ટ્રપતિ જેયર બોલ્સોનારોએ ટ્વિટર પર કહ્યું કે પ્રાદેશિક વિકાસ મંત્રાલય અને સશસ્ત્ર દળોની ટીમોને પણ રાહત અને બચાવ કાર્ય માટે લાગોસ મોકલવામાં આવશે.
