NIAએ એન્ટિલિયા અને મનસુખ હિરેન મૃત્યુ કેસ મામલે મામલે મોટી કાર્યવાહી કરી છે. એન્ટિલિયા કેસની તપાસ કરી રહેલી NIAએ રવિવારે મુંબઇ પોલીસ અધિકારી રિયાઝ કાઝીની ધરપકડ કરી છે. એજન્સીએ કહ્યું કે મુંબઈ પોલીસ અધિકારી રિયાઝે એન્ટિલિયા કેસના કાવતરામાં સચિન વાઝેની મદદ કરી હતી. જણાવી દઈએ કે સચિન વાઝે પણ એનઆઈએની કસ્ટડીમાં છે.
સચિન વાઝેની જેમ રિયાઝ કાઝી પણ સહાયક પોલીસ નિરીક્ષક છે. એન્ટિલિયા કેસ ઉપરાંત મનસુખ હિરેનની મોત મામલે સચિન વાઝેની પણ તપાસ ચાલી રહી છે. 5 માર્ચે મનસુખની લાશ મુંબઈમાં મળી હતી. એવું કહેવામાં આવે છે કે 25 ફેબ્રુઆરીએ અંબાણીના ઘર નજીક જે સ્કોર્પિયો પાર્ક કરવામાં આવી હતી તે મનસુખની હતી. આ પછી, 13 માર્ચે સચિન વાઝેની ધરપકડ કરવામાં આવી હતી.
કોર્ટે સસ્પેન્ડ મુંબઈ પોલીસ અધિકારી સચિન વાઝેને 23 એપ્રિલ સુધી એનઆઈએ કસ્ટડીમાં રાખવાનો આદેશ આપ્યો છે. સચિન વાઝે મનસુખ હિરેનની હત્યા અને મુકેશ અંબાણીના ઘરની બહાર મળેલી શંકાસ્પદ કારના કેસમાં આરોપી છે. અદાલતે રાષ્ટ્રીય તપાસ એજન્સી દ્વારા સચિન વાઝેની ન્યાયિક કસ્ટડીની માંગ કરી હતી જેથી તેની પૂછપરછ કરી શકાય. એજન્સીની આ માંગને કોર્ટે સ્વીકારી લીધી છે. કોર્ટની સુનાવણી દરમિયાન સચિન વાઝેના વકીલે તેમના જીવનને જોખમ ગણાવ્યું હતું. વાઝેના વકીલે કહ્યું કે તેમનો જીવ જોખમમાં છે. તેથી, તેમની સલામતી સુનિશ્ચિત કરવા માટે તેમને જેલમાં સલામત સેલ આપવો જોઈએ.
હકીકતમાં, ઉદ્યોગપતિ મુકેશ અંબાણીની વિસ્ફોટક કાર અને મનસુખ હિરેનની હત્યાના કેસમાં ધરપકડ કરાયેલા પોલીસ અધિકારી સચિન વાઝેની ગેમ અહીં સુધી મર્યાદિત નહોતી. એનઆઈએના સૂત્રો કહે છે કે વાજે આતંકવાદી સંગઠનના નામે બીજી મોટી કાવતરાની યોજના બનાવવામાં સામેલ હતો. પોતાની ચાલને અંજામ આપી બીજું કાવતરું ચલાવી શકે તે પહેલાં તે પોતાની જ બનાવેલી જાળમાં ફસાઈ ગયો હતો અને હવે તે એનઆઈએની કેદમાં છે.
એનઆઈએના સૂત્રોએ જણાવ્યું હતું કે, ‘મુંબઈમાં ઉદ્યોગપતિ મુકેશ અંબાણીના ઘર એન્ટિલિયાની બહાર વિસ્ફોટક પદાર્થો મૂક્યા પછી સચિન એક મોટા ષડયંત્રની યોજનામાં વ્યસ્ત હતો. એનઆઈએના સૂત્રએ જણાવ્યું હતું કે પ્રદીપ શર્માએ વાઝેને લોજિસ્ટિક્સ સપોર્ટ આપ્યો છે કે કેમ તે શોધવા પ્રયાસો કરવામાં આવી રહ્યા છે.
