ભારતીય સ્ટાર ખેલાડી નીરજ ચોપરાનું વર્લ્ડ એથ્લેટિક્સ ચેમ્પિયનશિપ 2022માં ગોલ્ડ જીતવાનું સપનું પૂરું થઈ શક્યું નથી. રવિવારે રમાયેલી ફાઈનલ મેચમાં નીરજ ગ્રેનાડાના એન્ડરસન પીટર્સને હરાવી શક્યો નહોતો અને તેને સિલ્વર મેડલથી સંતોષ માનવો પડ્યો હતો. એન્ડરસન પીટર્સે 90.54 મીટરના શ્રેષ્ઠ થ્રો સાથે ગોલ્ડ મેડલ જીત્યો હતો.
ઉલ્લેખનીય છે કે નીરજે પરાજ્ય આપનાર 24 વર્ષીય એન્ડરસન પીટર્સની અદભુત જીવનની ગાથા છે. પીટર્સ બાળપણમાં કેરી તોડવા માટે ઝાડ પર પથ્થર ફેંકતા હતા. પીટર્સે 10 વર્ષની ઉંમરે જવેલિન ફેંકવાનું શરૂ કર્યું અને શાળાનો રેકોર્ડ બનાવ્યો. એન્ડરસન પીટર્સ પણ ઝડપી બોલિંગ કરતો હતા, તેથી તે ક્રિકેટર અને દોડવીર બનવા માંગતા હતા, પરંતુ ઇજાઓને કારણે, અંતે તેમનો સંપૂર્ણપણે ધ્યાન જેવલિન તરફ વળ્યો.
પીટર્સે વર્લ્ડ એથ્લેટિક્સ પોડકાસ્ટને કહ્યું, ‘મને ક્રિકેટ પસંદ હતું. ગ્રેનાડામાં, અમારી પાસે બે સીઝન હતી, એક ક્રિકેટ અને બીજી ટ્રેક એન્ડ ફિલ્ડ. હું એક ઝડપી બોલર હતો, મને ફક્ત બોલ ફેંકવાનો વિચાર ગમ્યો, મને લાગ્યું કે હું તેને એટલી ઝડપથી ફેંકી શકું કે બેટ્સમેન તેને જોઈ પણ ન શકે. હું હંમેશા 90 માઇલ પ્રતિ કલાકની ઝડપે બોલિંગ કરવાનું લક્ષ્ય રાખતો હતો.નોંધનીય છે કે એન્ડરસન પીટર્સે 2019 દોહા વર્લ્ડ એથ્લેટિક્સ ચેમ્પિયનશિપમાં પણ ગોલ્ડ જીત્યો હતો.
.