જમ્મુ -કાશ્મીરમાં સુરક્ષા દળોને મોટી સફળતા મળી છે. આતંકવાદીઓ અને સુરક્ષા દળો વચ્ચે એન્કાઉન્ટરમાં બે આતંકીઓ માર્યા ગયા છે. હાલમાં, સુરક્ષા દળો આ વિસ્તારમાં સર્ચ ઓપરેશન ચલાવી રહ્યા છે.મળતી માહિતી મુજબ ગુપ્તચર એજન્સીઓને શ્રીનગરના બટમાલુ વિસ્તારમાં આતંકવાદીઓના છુપાયા હોવાની માહિતી મળી હતી. માહિતી મળ્યા બાદ સુરક્ષા દળોએ વિસ્તારને ઘેરી લીધો હતો. પોતાને ઘેરાયેલા જોઈને આતંકીઓએ સુરક્ષા દળો પર ગોળીબાર કર્યો હતો.
સુરક્ષા દળોએ આતંકવાદીઓને આત્મસમર્પણ કરવા કહ્યું, પરંતુ આતંકવાદીઓએ ફાયરિંગ ચાલુ રાખ્યું. સુરક્ષા દળોએ જવાબી કાર્યવાહી કરીને બે આતંકીઓને ઠાર કર્યા હતા.આઈજીપી કાશ્મીર વિજય કુમારે કહ્યું કે શ્રીનગર શહેરમાં બે આતંકીઓ માર્યા ગયા. વિસ્તારમાં સર્ચ ઓપરેશન હાથ ધરવામાં આવી રહ્યું છે.કાશ્મીરના પોલીસ મહાનિરીક્ષકે કહ્યું કે આજે એક મોટી સફળતા મળી છે. પ્રતિબંધિત આતંકવાદી સંગઠન લશ્કર-એ-તૈયબા અને ધ રેઝિસ્ટન્સ ફ્રન્ટના ટોચના કમાન્ડર, અબ્બાસ શેખ અને સાકીબ મંઝૂર માર્યા ગયા. બંને આતંકવાદીઓ સામાન્ય લોકોની હત્યામાં સામેલ હતા.
ઉલ્લેખનીય છે કે દક્ષિણ કાશ્મીરના પુલવામા જિલ્લાના ત્રાલ જંગલમાં શનિવારે સુરક્ષા દળો દ્વારા જૈશ-એ-મોહમ્મદના ત્રણ આતંકીઓને ઠાર કરાયા હતા. ટોપ -10 ની યાદીમાં સામેલ આતંકવાદી વકીલ શાહ પણ આમાં સામેલ હતા. તેણે ત્રાલ મ્યુનિસિપલ કાઉન્સિલના પ્રમુખ અને ભાજપના નેતા રાકેશ પંડિતા સહિત ઘણા લોકોની હત્યા કરી હતી.
માર્યા ગયેલા આતંકીઓ પાસેથી બે એકે -47, એક એસએલઆર, એક યુબીજીએલ અને અન્ય હથિયારો મળી આવ્યા હતા. આ યુબીજીએલને 11 મી ડિસેમ્બર 2018 ના રોજ શોપિયાંના જૈનાપોરા ખાતે લઘુમતી ચોકી પર હુમલો કરીને લૂંટવામાં આવી હતી. માર્યા ગયેલા આતંકવાદીઓ આદિવાસી મહિલાઓને શારીરિક ત્રાસ આપતા હતા. આઇજી કાશ્મીર અને વિક્ટર ફોર્સના જીઓસીએ તેને મોટી સફળતા ગણાવી.
