મંતવ્ય ન્યૂઝ,
સમગ્ર રાજ્યમાં આજે નેશનલ ટેસ્ટિંગ એજન્સી દ્વારા મેડિકલ-ડેન્ટલ સહિતના કોર્સમાં પ્રવેશ માટે નીટની પરીક્ષા યોજાઇ હતી. સમગ્ર દેશમાં કુલ 13 લાખ વિદ્યાર્થીઓે નીટની પરીક્ષા આપી હતી. જ્યારે ગુજરાતમાં 80 હજાર વિદ્યાર્થીઓએ નીટની પરીક્ષા આપી હતી. આ વર્ષે નીટ માટે ગુજરાતી માધ્યમના અંદાજિત 39000 વિદ્યાર્થીઓએ પરીક્ષા આપી હતી. નીટની પરીક્ષાની સાથોસાથ દેશમાં લોકસભા ચૂંટણી હોવાને કારણે એજન્સીએ છેલ્લી ઘડીએ પરીક્ષા કેન્દ્રો બદલ્યા હતા. આ નિર્ણયને કારણે વિદ્યાર્થીઓ હાલાકીનો સામનો કરવો પડ્યો હતો. આ પરીક્ષાનું પરિણામ ૫મી જૂનના રોજ જાહેર થવાની શક્યતા છે.
રાજ્યમાં અમદાવાદ, ગાંધીનગર, વડોદરા, સુરત, રાજકોટ, ગોધરા, પાટણ, વલસાડ, ભાવનગર અને આણંદમાં ૧૪૨ સેન્ટરો ફાળવાયા છે. પરીક્ષાનો સમય બપોરે 2 થી 5નો રહેશે. નીટની પરીક્ષા 720 ગુણની રહેશે. તેમાં કુલ 180 પ્રશ્નો પૂછવામાં આવશે. પરીક્ષામાં ચોરી રોકવા માટે ડ્રેસ કોડ પણ અપાયો છે. આ સૂચના મુજબ પરીક્ષાર્થીઓએ ફૂલ બાયના કે એમ્બ્રોઇડરીવાળા કપડાં તેમજ બૂટ પહેરવાની મનાઇ છે. નોંધનીય છે કે આ વર્ષે રિપીટરની સંખ્યા પણ વધુ હોવાથી પ્રત્યેક બેઠકો માટે વધુ સ્પર્ધા થાય તેવી પૂરી સંભાવના છે.
.
